ஈழ மக்களின் வலியையும், வாழ்க்கைப் போராட்டத்தையும் நெகிழ்ச்சியோடு பேசும் ‘தாய்நிலம்’: டிரெய்லர் வெளியீடு!

இலங்கை ஈழ மண்ணில் பிறந்த மனிதர்களின் தீராத வலி, அவர்களின் வாழ்வியல் இயல்பு, தாய்நிலத்தின் மீது ஆறாத பாசம் ஆகியவற்றை மையமாகக் கொண்டு பிரம்மாண்டமாக உருவாகியிருக்கும் படைப்புதான் ‘தாய்நிலம்’. நெனி என்டர்டெயின்மென்ட்ஸ் பிரைவேட் லிமிடெட் தயாரிப்பில், அறிமுக இயக்குநர் அபிலாஷ் ஜி. தேவ் இயக்கத்தில் தயாராகியுள்ள இத்திரைப்படத்தின் டிரெய்லர் அண்மையில் வெளியாகி, ரசிகர்கள் மற்றும் திரை உலகினரின் கவனத்தை ஈர்த்து வருகிறது.

கதைக்களத்தின் உணர்ச்சிப் பிழம்பு:

போரின் கொடூர பிடியில் சிக்கி, சொந்த மண்ணையும் உறவுகளையும் இழந்து தவிக்கும் ஈழத் தமிழ் தந்தை மற்றும் அவரது சின்னஞ்சிறு மகளின் வாழ்க்கைப் பயணம்தான் இப்படத்தின் மையக்கரு. அகதியாக வேரோடு பிடுங்கி எறியப்பட்டு, வேறு வழியின்றி தமிழகத்திற்கு வந்து சேரும் அந்தத் தந்தை, தன் மகளுக்கு ஒரு நல்ல எதிர்காலத்தை அமைத்துக் கொடுக்கப் போராடும் உணர்வுப்பூர்வமான தருணங்கள் நெஞ்சைத் தொடுகின்றன.

புதிய சூழல், புதிய மனிதர்கள், வாழ வழியில்லாத நிலையிலும் கைகொடுக்கும் நல்ல உள்ளங்களின் ஆதரவு எனப் படம் நகர்ந்தாலும், பிறந்த தாய்நிலத்தின் நினைவுகள் அந்தத் தந்தையின் நெஞ்சில் என்றென்றும் நீங்காத வடுவாக நிலைத்திருக்கிறது. ஈழத் தமிழர்கள் சந்தித்த இழப்புகளையும், அவர்களின் மனப்போராட்டங்களையும் திரையில் அழுத்தமாகப் பதிவு செய்துள்ளது இத்திரைப்படம் .

நடிகர்கள் மற்றும் தொழில்நுட்பக் குழு:

இப்படத்தில் டாக்டர் அமர் ராமச்சந்திரன் மற்றும் நேகா அமர் முதன்மைப் பாத்திரங்களில் அற்புதமாக நடித்துள்ளனர். மேலும் பாலாசிங், தீபக் பிரபாகர், பத்மஜா, நிமிஷா நம்பியார், குரு தட்சணா, தளபதி ஆனந்த், சரவணன் சொக்கம்பட்டி ஆகியோர் முக்கியக் கதாபாத்திரங்களில் தங்கள் பங்களிப்பை வழங்கியுள்ளனர்.

• இயக்கம்: அபிலாஷ் ஜி. தேவ்

• ஒளிப்பதிவு: பிரசாந்த் பிரணவம்

• இசை & பின்னணி இசை: ஔசேப்பச்சன்

• படத்தொகுப்பு: தீஜோ பி. வர்கீஸ்

• கலை இயக்கம்: கைலாஸ் திரிப்பூனிதுறை

• ஒலி அமைப்பு (Mixing): ராஜாகிருஷ்ணன்

சர்வதேச விருதுகளும் அங்கீகாரங்களும்:

திரையரங்குகளில் வெளியாவதற்கு முன்பாகவே சர்வதேச அளவில் பல்வேறு திரைப்பட விழாக்களில் இத்திரைப்படம் பெரும் பாராட்டைப் பெற்றுள்ளது.

• கனடாவின் Toronto Tamil Film Festival, சுவீடனின் Luleå International Film Festival, பெல்ஜியத்தின் Catharsis International Film Festival ஆகியவற்றில் அதிகாரப்பூர்வத் தேர்வாக (Official Selection) இடம் பெற்றுள்ளது.

• Crown Wood International Film Festival – சிறந்த இந்தியத் திரைப்படம் (Best Indian Film)

• Seventh Art Independent International Film Festival – சிறந்த பின்னணி இசை (Best Original Score)

• Tamil Nadu International Film Festival – சிறந்த அறிமுக இயக்குநர் மற்றும் சிறந்த திரைப்படத்திற்கான சிறப்பு விருது (Best Debut Filmmaker & Special Mention)

• Cosmos International Film Festival – சிறந்த ஒளிப்பதிவாளர் மற்றும் சிறந்த அறிமுக இயக்குநர் விருதுகள்

திரைப்பட விழாக்களில் குவிந்த அங்கீகாரங்களைத் தொடர்ந்து, தற்போது வெளியாகியுள்ள டிரெய்லரும் ரசிகர்கள் மத்தியில் எதிர்பார்ப்பை எகிற வைத்துள்ளது. நெஞ்சைத் தொடும் இந்த உணர்வுப்பூர்வமான ‘தாய்நிலம்’ திரைப்படம் அக்டோபர் ஒன்பதாம் தேதி உலகமெங்கும் திரையரங்குகளில் வெளியாகிறது.