நெட்பிளிக்ஸ் IN லவ்: கெமிஸ்ட்ரியா… கம்ஃபோர்ட்டா.. மோதல்!

ஸ்வைப் பண்ணா மேட்ச் ஆகலாம், ஆனா லைஃப் செட் ஆகுமா? டிஜிட்டல் காலத்து டேட்டிங் கலாச்சாரத்தை அலசி ஆராயும் நெட்ஃப்ளிக்ஸின் ‘#Love’ வெப் சீரிஸ் டிரெய்லர் வெளியீட்டு விழா சென்னையில் ரகளையாக நடந்தது! ஷோ-ரன்னராக சௌந்தர்யா ரஜினிகாந்த் கலக்க, பாலாஜி மோகன் இயக்கத்தில் அர்ஜுன் தாஸ் – ஐஸ்வர்யா லட்சுமி ஜோடியின் மாஸ் காம்போவில் உருவாகியுள்ள இந்த தொடரின் பேச்சுக்கள் அனைத்தும் செம ஹாட்!

விழாவில் நெட்ஃப்ளிக்ஸ் பிரதிநிதி மோனிகா ஸ்ரீவாஸ்தவ் பேசுகையில், “தமிழ் படைப்புகளுக்கு உலகளவில் வரவேற்பு அதிகம். இரண்டு போட்டி டேட்டிங் ஆப் நிறுவனர்களுக்குள் நடக்கும் இந்த கெமிஸ்ட்ரி – காம்பாட்டிபிலிட்டி மோதல், இளைஞர்களின் எண்ணங்களை அச்சு அசலாகப் பிரதிபலிக்கும்” என்று நம்பிக்கையோடு தொடங்கினார்.

அடுத்து மைக் பிடித்த ஷோ-ரன்னர் சௌந்தர்யா ரஜினிகாந்த், “தலைவரின் மகளாக இருப்பதால் எதுவுமே எனக்கு சீக்கிரத்தில் ஆச்சரியம் தராது! ஆனால் மோனிகாவின் தலைமைப்பண்பு வியக்க வைத்தது. ‘Spider-Man’ ஸ்டைலில் பெரிய அதிகாரத்தோடு பெரிய பொறுப்பும் வந்தது. சரியான நேரத்தில் தைரியமாக முடிவெடுக்க இந்த தொடர் எனக்குக் கற்றுக்கொடுத்தது” என்று கெத்தாகப் பகிர்ந்தார்.

இயக்குநர் பாலாஜி மோகன் தன் பாணியில், “காதல் யாராலும் புரிந்துகொள்ள முடியாத புதிர்! அதனால்தான் திரும்பத் திரும்ப அதைப் பற்றிப் பேசுகிறேன். நிஜ வாழ்க்கைக்கு நெருக்கமான ஒரு ஜாலி அனுபவமாக இந்தத் தொடர் இருக்கும்” என்றார்.

நாயகன் அர்ஜுன் தாஸ் பேசும்போது, “என் கதாபாத்திரத்தில் இருக்கும் பலவீனமான பக்கமே என்னைக் கவர்ந்தது. நிஜ வாழ்க்கையில் கெமிஸ்ட்ரியை விடக் காம்பாட்டிபிலிட்டிதான் நீண்ட காலத்திற்கு முக்கியம்” என்று கணக்குப் போட்டார். அதற்கு அப்படியே எதிர்நீச்சல் போட்ட நாயகி ஐஸ்வர்யா லட்சுமி, “தாராவாக நடித்தது செம ஃப்ரீடம்! என்னை பொறுத்தவரை கெமிஸ்ட்ரிதான் முதலில் பொறி பறக்க வேண்டும், அப்புறம்தான் கம்ஃபோர்ட் எட்டிப்பார்க்கும்” என்று சுடச்சுட வாதிட்டார்.

ஒட்டுமொத்தமாக, நல்ல முத்தத்திற்கு கெமிஸ்ட்ரியும் வேண்டும், கம்ஃபோர்ட்டும் வேண்டும் என்று படக்குழுவினர் ஏகோபித்த குரலில் கொடி பிடித்துள்ளனர்! May6 Entertainment Factory தயாரிப்பில், ஷான் ரோல்டன் இசையில் உருவாகியுள்ள இந்த நவயுக காதல் திருவிழா அக்டோபர் 2 முதல் நெட்ஃப்ளிக்ஸில் ஸ்ட்ரீம் ஆகிறது. கெமிஸ்ட்ரியா… கம்ஃபோர்ட்டா… எது ஜெயிக்கிறது என்று பொறுத்திருந்து பார்ப்போம்!