‘ஆக்ஷன் கிங்’ அர்ஜுனின் அதிரடி ‘பிளாஸ்ட்’: 28 முதல் திரையரங்குகளை அதிர வைக்க வருகிறது!

ஏ.ஜி.எஸ் என்டர்டெய்ன்மென்ட்’ நிறுவனத்தின் இருபதாவது ஆண்டு தயாரிப்பாக உருவாகியுள்ள திரைப்படம் ‘பிளாஸ்ட்’. அறிமுக இயக்குநர் சுபாஷ் கே. ராஜ் இயக்கத்தில், ‘ஆக்ஷன் கிங்’ அர்ஜுன், அபிராமி, ப்ரீத்தி முகுந்தன் ஆகியோர் முதன்மைப் பாத்திரங்களில் நடித்துள்ளனர். வரும் மே இருபத்தெட்டாம் தேதி உலகம் முழுவதும் திரையரங்குகளில் வெளியாகவுள்ள இத்திரைப்படத்தின் பத்திரிகையாளர் சந்திப்பு சென்னையில் கோலாகலமாக நடைபெற்றது.

குருவுக்கு நன்றி சொன்ன அறிமுக இயக்குநர் சுபாஷ் கே. ராஜ்

தன்னுடைய முதல் மேடையில் பேசிய இயக்குநர் சுபாஷ் கே. ராஜ், தனக்குத் திரையுலகில் வழிகாட்டியாக இருந்த ‘லவ் டுடே’ பட இயக்குநர் பிரதீப் ரங்கநாதனுக்குத் தன்னுடைய சிறப்பான நன்றியைத் தெரிவித்தார். பிரதீப் ரங்கநாதன் மூலமாகவே ஏ.ஜி.எஸ் நிறுவனத்திடம் கதை சொல்லும் வாய்ப்பு கிடைத்ததாகக் குறிப்பிட்ட அவர், கதையைக் கேட்ட மாத்திரத்திலேயே தயாரிப்பாளர் அகோரம் படத்தை உருவாக்கச் சம்மதித்த மறக்க முடியாத தருணத்தைப் பகிர்ந்துகொண்டார்.

“இது ஒரு குடும்பங்கள் கொண்டாடும் ஆக்ஷன் திரைப்படம். சமூகத்திற்குத் தேவையான கருத்துக்களைப் பிரச்சாரமாக இல்லாமல், கதையோடு சேர்த்துச் சுவாரசியமாகச் சொல்லியிருக்கிறோம். படத்தில் வரும் பெண் கதாபாத்திரத்திற்கு என்னுடைய அம்மாவே உத்வேகம், அவரும் கராத்தேயில் பிளாக் பெல்ட் வாங்கியவர்.” என்று இயக்குநர் நெகிழ்ச்சியுடன் குறிப்பிட்டார்.

தமிழில் தடம் பதிக்கும் ரவி பஸ்ரூர்

‘கே.ஜி.எஃப்’ படப் புகழ் இசையமைப்பாளர் ரவி பஸ்ரூர் இத்திரைப்படத்தின் மூலம் தமிழில் அறிமுகமாகிறார். படம் குறித்து அவர் பேசுகையில், தமிழ் சினிமா என்பது ஒரு கடல் போன்றது என்றும், இயக்குநர் சுபாஷ் கதையை மிகவும் விரிவாகவும், ஆக்ஷன் காட்சிகளின் விளக்கங்களுடனும் கூறிய விதம் தனக்கு மிகவும் பிடித்திருந்ததாகவும் தெரிவித்தார்.

புதுமுக இயக்குநரின் உழைப்பைப் பாராட்டிய அவர், “ஒரு எறும்பின் திறமையைக் கூட நேஷனல் ஜியோகிராபிக் சேனல் ஜூம் செய்து காட்டினால்தான் உலகம் அறியும். அதுபோல சுபாஷின் திறமையை ஜூம் செய்து பார்த்து வாய்ப்பளித்த ஏ.ஜி.எஸ் நிறுவனத்திற்கு நன்றி” என்று உவமையோடு பாராட்டினார். மேலும், சர்வதேச இசைக் கலைஞர்களின் பங்களிப்போடு உருவாகியுள்ள இத்திரைப்படம், தனது இசைப் பயணத்தில் ஒரு சிறந்த படமாக இருக்கும் என்றும், திரையரங்கில் மட்டுமே இதன் முழு அனுபவத்தைப் பெற முடியும் என்றும் கூறினார்.

பவர்ஃபுல் பாத்திரத்தில் ப்ரீத்தி முகுந்தன்

வளரும் கலைஞரான தனக்கு நிலா என்ற ஒரு வலிமையான ஆக்ஷன் கதாபாத்திரத்தைக் கொடுத்ததற்கு இயக்குநர் மற்றும் தயாரிப்பு நிறுவனத்திற்குத் தனது நன்றியைத் தெரிவித்தார். பெண்களுக்கு இதுபோன்ற கதாபாத்திரங்கள் கிடைப்பது அரிது என்று குறிப்பிட்ட அவர், அர்ஜுன் மற்றும் அபிராமி போன்ற மூத்த கலைஞர்களுடன் நடித்ததன் மூலம் பல விஷயங்களைக் கற்றுக் கொண்டதாகக் கூறினார். சண்டைக் காட்சிகளில் சிறப்பாகச் செயல்பட உதவிய சண்டை பயிற்சி இயக்குநர் பீனிக்ஸ் பிரபுவிற்கும் நன்றி தெரிவித்தார்.முதன்முறையாக அதிரடி அவதாரத்தில் அபிராமி

நீண்ட இடைவெளிக்குப் பிறகு மேடையேறிய நடிகை அபிராமி, இந்த ஆண்டில் வெளியாகும் தனது முதல் படம் இது என்று மகிழ்ச்சியைப் பகிர்ந்துகொண்டார். ‘ஆக்ஷன் கிங்’ அர்ஜுனுடன் இருபத்தைந்து ஆண்டுகளுக்குப் பிறகு மீண்டும் இணைந்து நடித்திருப்பது மறக்க முடியாத அனுபவம் என்றார்.

காமெடி, ஹாரர், ரொமான்ஸ் எனப் பல ஜானர்களில் நடித்திருந்தாலும், முதன்முறையாக இதில் ஆக்ஷன் காட்சிகளில் நடித்திருப்பதாகக் குறிப்பிட்டார். “வாழ்க்கையில் யாரையும் கை நீட்டி அடிக்காத என்னை, இந்தப் படத்தில் பயங்கரமாகவும், டெரராகவும் காட்டியுள்ளனர்” என்று நகைச்சுவையுடன் கூறினார். பெண்கள் தலைமை தாங்கும் ஏ.ஜி.எஸ் நிறுவனம் நேர்த்தியாகச் செயல்படுவதற்கு அர்ச்சனா மற்றும் ஐஸ்வர்யா கல்பாத்தியே சான்று என்றும் பாராட்டினார்.

ஏ.ஜி.எஸ் நிறுவனத்தின் சமூக நோக்கம் (அர்ச்சனா கல்பாத்தி)

கிரியேட்டிவ் புரொடியூசர் அர்ச்சனா கல்பாத்தி பேசுகையில், இது ஜென் ஸீ தலைமுறைக்கான படம் என்றும், பெண்களை உலகளவில் பெருமைப்படுத்தும் படைப்பு என்றும் பெருமிதம் கொண்டார்.

• பெண் பாதுகாப்பு: தற்காப்புக் கலையைக் கற்றுக் கொண்டால் ஒரு பெண் இந்தச் சமூகத்தில் எப்படிப் பாதுகாப்பாக வாழ முடியும் என்பதைப் படம் பேசுகிறது.

• அப்பா கதாபாத்திரம்: ஒரு பெண் குழந்தையை எப்படி வளர்க்க வேண்டும் என்று சொல்லும் அப்பா கதாபாத்திரத்திற்கு, நிஜ வாழ்க்கையிலும் இரண்டு பெண் குழந்தைகளுக்கு அப்பாவான நடிகர் அர்ஜுன் மட்டுமே பொருத்தமானவராகத் தெரிந்தார்.

• இசை பலம்: ரவி பஸ்ரூரின் பின்னணி இசை இத்திரைப்படத்திற்கு ஒரு ஜீவனாக அமைந்துள்ளது.

‘கராத்தே மாஸ்டர்’ அர்ஜுனின் பாராட்டு

நிகழ்வின் நிறைவாகப் பேசிய நடிகர் அர்ஜுன், முதலில் தமிழக முதல்வர் விஜய் அவர்களுக்குத் தனது மனமார்ந்த வாழ்த்துகளைத் தெரிவித்தார். எத்தனையோ படங்களில் நடித்திருந்தாலும், தனது நீண்ட காலத் திரைப்பயணத்தில் முதன்முறையாகக் கராத்தே மாஸ்டர் கதாபாத்திரத்தில் நடித்திருப்பது இதுவே முதல் முறை என்று குறிப்பிட்டார்.

இயக்குநர் சுபாஷின் சாதுரியத்தையும் வேலை வாங்கும் திறனையும் பாராட்டிய அவர், ஏ.ஜி.எஸ் நிறுவனத்தின் தொழில்முறை அணுகுமுறையை வியந்து பேசினார். சக நடிகைகளான அபிராமியின் அசாத்திய தமிழ் வளர்ச்சியையும், ப்ரீத்தி முகுந்தனின் அர்ப்பணிப்பையும், ஆக்ஷன் காட்சிகளில் அவரது கால்கள் அசாதாரண உயரத்திற்குச் சென்ற விந்தையைப் பற்றியும் பாராட்டிப் பேசினார். ஒட்டுமொத்தக் குழுவின் கூட்டு முயற்சியால் ‘பிளாஸ்ட்’ திரைப்படம் தியேட்டர்களில் ஒரு நிஜமான பிளாஸ்ட்டாக இருக்கும் என்று வாழ்த்தி முடித்தார்.