விஜய் சேதுபதி – பூரி ஜெகன்நாத் கூட்டணியின் பான்-இந்தியா அதிரடி ‘ஸ்லம் டாக்’ அப்டேட்!

வித்தியாசமான கதைக்களங்களுக்குப் பெயர் போன இயக்குநர் பூரி ஜெகன்நாத் மற்றும் நடிப்பில் எப்போதுமே மிரட்டும் மக்கள் செல்வன் விஜய் சேதுபதி ஆகியோர் முதன்முறையாக இணைந்துள்ள பான்-இந்தியா ஆக்சன் அதிரடித் திரைப்படம் “ஸ்லம் டாக்” (33 Temple Road).

டைட்டில் மற்றும் ஃபர்ஸ்ட் லுக் போஸ்டர் மூலமே ரசிகர்களின் எதிர்பார்ப்பைக் கிளப்பிய இந்தத் திரைப்படத்தின் போஸ்ட் புரடக்சன் பணிகள் இப்போது செம ஸ்பீடாக நடந்து வருகின்றன. இந்நிலையில், படத்தின் அடுத்தகட்ட அதிரடி புரமோஷனை படக்குழு ஆரம்பித்துள்ளது.

அதன்படி, ‘ஸ்லம் டாக்’ படத்தின் மாஸான டீசர் வரும் ஜூன் 8-ஆம் தேதி வெளியாகும் என அதிகாரப்பூர்வமாக அறிவிக்கப்பட்டுள்ளது!

டீசர் தேதியோடு வெளியாகியிருக்கும் புதிய போஸ்டர் செம வைப் ரகம்! கண்கள் கட்டப்பட்ட ஒருவரின் கழுத்தில் ரத்தக்கறை படிந்த அரிவாள் வைக்கப்பட்டிருக்கும் அந்த மிரட்டலான காட்சி, படம் எந்தளவுக்கு ஒரு டார்க் மற்றும் ரா ஆக்சன் உலகத்தைக் காட்டப் போகிறது என்பதை அப்பட்டமாக உணர்த்துகிறது.

நட்சத்திரப் பட்டாளம் மற்றும் தொழில்நுட்பக் குழு:

• நடிகர்கள்: விஜய் சேதுபதியுடன் ஜோடியாக சம்யுக்தா நடிக்க, முக்கிய வேடங்களில் பாலிவுட் நடிகை தபு மற்றும் கன்னட திரையுலகின் முன்னணி நட்சத்திரம் துனியா விஜய் ஆகியோர் நடித்துள்ளனர். இவர்களுடன் பிரம்மாஜி, விடிவி கணேஷ் உள்ளிட்ட பலரும் களம் காண்கின்றனர்.

• இசை: “அர்ஜுன் ரெட்டி”, “அனிமல்” போன்ற படங்களில் தனது பின்னணி இசையால் அதிரடி காட்டிய தேசிய விருது பெற்ற இசையமைப்பாளர் ஹர்ஷவர்தன் ரமேஷ்வர் இப்படத்திற்கு இசையமைக்கிறார்.

• தயாரிப்பு: Puri Connects சார்பில் பூரி ஜெகன்நாத், சார்மி கௌர் மற்றும் JB Motion Pictures சார்பில் JB நாராயண் ராவ் கொண்ட்ரோலா ஆகியோர் இணைந்து தயாரித்துள்ளனர்.

தமிழ், தெலுங்கு, கன்னடம், மலையாளம், இந்தி என ஐந்து மொழிகளில் பிரம்மாண்டமாக வெளியாகவிருக்கும் இந்த ‘ஸ்லம் டாக்’ படத்தின் டீசருக்காக சினிமா ரசிகர்கள் இப்போதே வெறித்தனமாகக் காத்திருக்கத் தொடங்கிவிட்டனர்!