“பிராமணர்கள் எல்லோரும் அயோக்கியர்களா?!”:  வெடித்த எதிர்ப்பு… தடை செய்யப்பட்ட டீசர்!

“பிராமணர்கள் அனைவரும் அயோக்கியர்கள்!” என்ற வசனம் இடம் பெற்றதால் எதிர்ப்பு கிளம்பியதை அடுத்து “காட்மேன்” என்ற வெப் தொடரின் டீசர் தடை செய்யப்பட்டது.

ஸீ டி.வி. குழுமத்தின், “ஸீ 5” என்கிற இணைய சேனல் (ஓ.டி.டி.) பிரபலமானது. இதில், திரைப்பட இயக்குனர் பாபு யோகஸ்வரன் இயக்கத்தில், டேனியல் பாலாஜி, சோனியா அகர்வால் உள்ளிட்டோர் நடித்த “காட் மேன்” என்ற வெப் தொடர் வரும் ஜூன் 12 முதல் ஒளிபரப்பாகும் என அறிவிக்கப்பட்டது.

இரு நாட்களு்கு முன் இத்தொடரின் டீசர் வெளியானது.

இதில், “பிராமணாள் மட்டும் தான் வேதம் படிக்கணும்னு எந்த சாஸ்திரத்துல சொல்லி இருக்கு?”, “என்னைச் சுத்தி இருக்கும் பிராமணர்கள் எல்லோரும் அயோக்கியர்களாக இருக்கா!” என்றும் வசனங்கள் இடம் பெற்றன.

மேலும், பிராமணராக மாற முயலும் டேனியல் பாலாஜி ஒரு பெண்ணுடன் மிக நெருக்கமாக இருக்கும் படுக்கையறை காட்சிகளும், மது அருந்தும் காட்சிகளும் இடம் பெற்றுள்ளன.

இதையடுத்து இந்து அமைப்புகள் பல, இதற்கு எதிர்ப்பு தெரிவித்தன. மேலும், தமிழக பாஜக சட்டப்பிரிவு மாநிலச் செயலாளர் அஸ்வத்தாமன் சார்பில் சென்னை  காவல்துறை ஆணையாளர்  அலுவலகத்தில் புகார் அளிக்கப்பட்டுள்ளது.

அதில், “காட்மேன் வெப் தொடரில் பிராமணர்களை பற்றியும், இந்து மதத்தைப் பற்றியும் அவதூறான கருத்துக்களும், கொச்சைப்படுத்தும் வசனங்களும் இடம் பெற்றுள்ளன. வேண்டுமென்றே குறிப்பிட்ட சமூகத்தினரை அவமானப்படுத்தி அவர்களை தூண்டிவிட்டு பொது அமைதிக்கு குந்தகம் விளைவிக்க முயற்சிக்கிறார்கள்.

ஆகவே, “காட்மேன்” வெப் தொடரின் படத்தின் இயக்குநர், தயாரிப்பாளர், நடிகர்கள், ஸீ 5 நிர்வாக இயக்குநர் ஆகியோர் மீது சட்டப்படி நடவடிக்கை எடுக்க வேண்டும்!” என குறிப்பிடப்பட்டு உள்ளது.

இது போல், இந்து தமிழர் கட்சியின் தலைவர் ராம.ரவிக்குமார், “ இந்து மத நம்பிக்கைகளை கொச்சைப்படுத்தும் இத்தொடரின்  தயாரிப்பாளர் இயக்குனர் மற்றும் படத்தை வெளியிடக் கூடிய தொலைக்காட்சி ஊடகம் ஆகியவற்றின் மீது சட்ட நடவடிக்கை எடுக்க வேண்டும். மேலும், சர்ச்சைக்குரிய காட்சிகள் மற்றும் வசனங்களை நீக்க வேண்டும். இல்லாவிட்டால் தொலைக்காட்சியின் முன்பு போராட்டம் நடத்தப்படும்!” என என்றும் எச்சரிக்கை விடுத்துள்ளார்.

தற்போது இத்தொடரின் டீசர், யூ டியுபில் இருந்து நீக்கப்பட்டுள்ளது.