‘செய் செய்யாதே’ : விமர்சனம்: மெடிக்கல் மாஃபியாக்களின் கொடூர பக்கங்கள்!

தமிழ் திரையுலகில் ஒவ்வொரு வாரமும் எவ்வளவோ படங்கள் வந்தாலும், சில படங்கள் மட்டுமே நம்மைக் சிந்திக்க வைத்துவிட்டுப் போகும். அந்த வகையில், மருத்துவத் துறையின் உள்ளே நடக்கும் ஊழல்களைப் புட்டுப்புட்டு வைத்து, ஏழை எளிய மக்களின் கண்ணீரைத் துடைக்க வரும் ஒரு மாபெரும் மருத்துவரின் கதையாக வந்துள்ளது ‘செய் செய்யாதே’ திரைப்படம்! ஹரிணி சுப்பு சினி கிரியேஷன்ஸ் சார்பில் சுப்புலட்சுமி ஜெயராம் பிரம்மாண்டமாகத் தயாரிக்க, டாக்டர் எஸ். ராஜா கதை, திரைக்கதை, வசனம் எழுதி இயக்கியுள்ளார். சமூக அக்கறையும் விறுவிறுப்பும் ஒருசேரக் கலந்த இப்படம் ரசிகர்களைக் கவர்ந்து வருகிறது.

கதைக்களம் தரும் சலசலப்பு!

மதுரை அரசு மருத்துவமனையில் தலைமை மருத்துவப் பொறுப்பில் இருக்கும் டாக்டர் சந்திரபோஸாக டாக்டர் எஸ். ராஜா அசத்துகிறார். பணம் பார்க்கத் துடிக்கும் உலகத்தில், நடுத்தர மற்றும் ஏழை எளிய மக்களின் ஒரே பாதுகாவலனாக நின்று நேர்மையான சிகிச்சை அளிப்பதே இவரது முழு மூச்சு. ஆனால், இவருடைய மனைவியான டாக்டர் விஜயலட்சுமி (தர்ஷினி ரெட்டி), சொந்தமாகப் பெண்களுக்கென ஒரு மருத்துவமனை தொடங்கி, சிகிச்சை என்ற பெயரில் அப்பாவிப் பொதுமக்களிடம் லட்சக்கணக்கில் கொள்ளையடிக்கிறார்.

மனைவியின் இந்த சுயநலப் போக்கை அறிந்தும் அறியாமலும், பல நோயாளிகளை ரகசியமாக அரசு மருத்துவமனைக்கு அழைத்து வந்து காப்பாற்றுகிறார் நமது ஹீரோ டாக்டர் சந்திரபோஸ். இதற்கிடையில், மருத்துவக் கல்லூரி மாணவனான நாயகன் டாக்டர் விஜய் (குரு விஜய்), தொழிலதிபர் தங்கதுரையின் (சிதம்பரம் PDK) மகளான நாயகி தபிதா குணரத்னே மீது காதல் வயப்படுகிறார். மறுபுறம், முறைகேடுகளில் ஈடுபடும் தொழிலதிபர் சிதம்பரத்தின் மருந்து கிடங்குகளுக்கு அரசு சீல் வைக்கிறது.

இச்சூழலில், அரசு மருத்துவமனையில் நேரத்தைக் கடைப்பிடிக்காத அமைச்சரின் உறவினரை டாக்டர் சந்திரபோஸ் கடுமையாகக் கண்டிக்கிறார்; செவிலியர்களின் முறைகேடுகளையும் தட்டிக் கேட்கிறார். இதனால் ஊழல்வாதிகளான மனைவி தர்ஷினி ரெட்டி, சக்திவாய்ந்த அமைச்சர் மற்றும் தொழிலதிபர் சிதம்பரம் PDK ஆகிய மூவரும் ஒன்று சேர்ந்து, நேர்மையான இந்த மருத்துவரைக் மதுரையை விட்டே விரட்டப் போடும் சதித் திட்டங்கள் தான் படத்தின் திருப்பங்கள்! இக்கட்டான இந்தச் சூழலில் கொரோனா போன்ற ஒரு கொடூரமான தொற்றுநோய் பரவத் தொடங்க, ஊரடங்கு உத்தரவு பிறப்பிக்கப்படுகிறது. எதிரிகளின் இந்த நயவஞ்சக வலையிலிருந்து டாக்டர் சந்திரபோஸ் எப்படித் தப்புகிறார்? இறுதியில் என்ன நிகழ்கிறது? என்பதே ‘செய் செய்யாதே’ படத்தின் எதிர்பார்ப்பு தாண்டிய விறுவிறுப்பான க்ளைமாக்ஸ்!

நடிப்பும் திரையுலகப் பங்களிப்பும்!

• இயக்கியதுடன் படத்தின் முதுகெலும்பாக நின்று நடித்துள்ள டாக்டர் எஸ். ராஜா, அறிமுக நடிகருக்கே உரிய தயக்கமே இல்லாமல் இயல்பான, உணர்வுபூர்வமான நடிப்பை வெளிப்படுத்தி கதாபாத்திரத்திற்கு உயிர் கொடுத்துள்ளார்.

• இளமைத் துள்ளலுடன் காதல், நடனம், செண்டிமெண்ட் என அனைத்திலும் முத்திரை பதித்துள்ளார் நாயகன் குரு விஜய்.

• கதையின் ஓட்டத்திற்குத் தகுந்தவாறு அளவான நடிப்பை வெளிப்படுத்தி ரசிகர்களைக் கவர்கிறார் நாயகி தபிதா குணரத்னே.

• இப்படத்தில் சிறப்புத் தோற்றத்தில் தமிழக முதலமைச்சராக மிரட்டியுள்ளார் பாஜக மூத்த தலைவர் எச். ராஜா.

• மேலும், வில்லத்தனமான மனைவியாக தர்ஷினி ரெட்டி, மற்றும் மோனிகா ப்ரீத்தி V., குழந்தை நட்சத்திரம் திவ்யாவாக பிரதீக்ஷா மனோ பிரசாந்த் ஆகியோர் தங்களின் பங்களிப்பைச் சிறப்பாகச் செய்துள்ளனர்.

தொழில்நுட்பக் கலைஞர்களின் கைவண்ணம்!

• இசை: டாக்டர் எஸ். ராஜாவின் இசையில் பாடல்கள் அனைத்தும் கேட்கும் ரகம்; பின்னணி இசை படத்திற்கு அசல் பலம் சேர்த்துள்ளது.

• ஒளிப்பதிவு: ராம்நாடு வாசு P. அவர்களின் கேமரா கோணங்கள் மதுரை மண் வாசனையையும் மருத்துவமனை பரபரப்பையும் துல்லியமாகத் திரையில் கொண்டு வந்துள்ளது.

• படத்தொகுப்பு: தேசிய விருது பெற்ற ராஜா முகமதுவின் கத்தரிப்பு வேலைகள் படத்திற்கு அசுர வேகத்தைத் தந்துள்ளது.

மருத்துவப் பணியின் அர்ப்பணிப்பு, குடும்ப உறவுகளின் மேன்மை மற்றும் சமூக விழிப்புணர்வு ஆகியவற்றைத் துள்ளல் நடையில் நேர்த்தியாகச் சொல்லியிருக்கும் இப்படம் அனைவரையும் ரசிக்க வைக்கும் ஒரு அருமையான படைப்பு!