லோகேஷ் கனகராஜ்  வழங்கும் அடுத்த அதிரடி! நாசர் – ரெஜினா – ரமேஷ் திலக் இணையும் மாஸ் ட்ராமா திரில்லர்!

தமிழ் திரையுலகின் பிரம்மாண்ட பிராண்டுகளாகத் திகழும் இரண்டு மிகப்பெரிய சக்திகள் இப்போது ஒரே புள்ளியில் கைகோர்த்துள்ளன! முன்னணி நட்சத்திர இயக்குநரும் நடிகருமான லோகேஷ் கனகராஜின் ‘ஜீ ஸ்குவாட்’ நிறுவனமும், ‘குட் பேட் அக்லி’, ‘டியூட்’, ‘மொத ராத்திரி’ என அடுத்தடுத்து பாக்ஸ் ஆபீஸ் வெற்றிகளைக் குவித்து வரும் இந்தியாவின் முன்னணி தயாரிப்பு நிறுவனமான ‘மைத்ரி மூவி மேக்கர்ஸ்’ அமைப்பும் இணைந்து புதிய திரைப்படமொன்றைத் தயாரிக்கின்றன. லோகேஷ் கனகராஜ், நவீன் யெர்னேனி, ஒய். ரவிசங்கர் ஆகியோர் கூட்டணியில் உருவாகும் இந்த பெயரிடப்படாத பிரம்மாண்ட திரைப்படத்தின் படப்பிடிப்பு அசுர வேகத்தில் நடந்து, தற்போது இறுதிச் சுற்றை எட்டியுள்ள நிலையில், படக்குழுவினர் பிரத்யேக அறிவிப்பு காணொளி ஒன்றை வெளியிட்டு ரசிகர்களின் ஆவலை எகிற வைத்துள்ளனர்!

‘சில நேரங்களில் சில மனிதர்கள்’, ‘பாம்’ போன்ற தரமான படைப்புகளை வழங்கி முத்திரை பதித்த இயக்குநர் விஷால் வெங்கட் இத்திரைப்படத்தைச் செதுக்கி வருகிறார். ஒரு சுவாரஸ்யமான ட்ராமா திரில்லர் கதைக் களத்தில் உருவாகும் இப்படத்தில், இந்திய திரையுலகின் அசாத்திய நடிகரான நாசர், வசீகர நாயகி ரெஜினா கஸாண்ட்ரா, எதார்த்த நடிப்பால் அசத்தும் ரமேஷ் திலக் ஆகியோர் முதன்மை வேடங்களில் இணைந்து புதுமையான கூட்டணி அமைத்துள்ளனர்.

தொழில்நுட்பக் கலைஞர்களின் பட்டாளமும் இப்படத்திற்குப் பெரு பலமாக அமைந்துள்ளது. ஹரிஹரன் ராஜூ கதையமைக்க, எஸ். கே. செல்வகுமார் தன் கேமரா மூலம் காட்சிகளுக்கு உயிர் கொடுக்கிறார். ‘ஹிருதயம்’ புகழ் ஹெஷாம் அப்துல் வஹாப் இப்படத்திற்கு இசையமைக்கிறார். கே. மனோஜ் குமார் கலை இயக்கத்தைக் கவனிக்க, படத்தொகுப்புப் பணிகளை ஜி. கே. பிரசன்னா சாமர்த்தியமாகக் கையாண்டு வருகிறார்.

அண்மையில் பாரம்பரிய முறையில் பூஜையுடன் தொடங்கப்பட்ட இப்படத்தின் படப்பிடிப்பு, மின்னல் வேகத்தில் நடைபெற்று நிறைவு கட்டத்தை நெருங்கிவிட்டது. இந்நிலையில், படத்தின் தலைப்பு மிக விரைவில் அதிகாரப்பூர்வமாக அறிவிக்கப்படும் என்பதைத் தெறிக்கவிடும் சிறப்பு வீடியோ மூலம் அறிவித்துள்ளது படக்குழு. லோகேஷ் கனகராஜின் ஜீ ஸ்குவாட் மற்றும் மைத்ரி மூவி மேக்கர்ஸ் கூட்டணியில், திறமையான நடிகர்கள் மற்றும் தொழில்நுட்பக் கலைஞர்களுடன் உருவாகும் இந்த ட்ராமா திரில்லர், திரை வணிகர்களிடமும் ரசிகர்கள் மத்தியிலும் மிகப்பெரிய எதிர்பார்ப்பு புயலைக் கிளப்பியுள்ளது!