“என் நடிப்பைப் பார்த்து கட்டிப்பிடித்து முத்தம் கொடுத்த நிமிஷா !”: கருணாஸ் நெகிழ்ச்சி!

தேசிய விருது பெற்ற திரை ஆளுமை சஜீவ் பழூர் எழுத்து, இயக்கத்தில் உருவாகியுள்ள ‘என்ன விலை’ திரைப்படம், திரைக்கு வரும் முன்பே சர்வதேச அளவில் கவனத்தை ஈர்த்துப் பெரும் எதிர்பார்ப்பை ஏற்படுத்தியுள்ளது. கலாமயா சினிவெர்ஸ் சார்பில் ஜித்தேஷ் விஸ்வம்பரன், அனுகோபால் வேணுகோபாலன் இணைந்து உருவாக்கியுள்ள இப்படத்தில் கருணாஸ், நிமிஷா சஜயன் உள்ளிட்டப் பலர் முதன்மைப் பாத்திரங்களில் மிளிர்ந்துள்ளனர். செப்டம்பர் பதினேழு அன்று உலகெங்கும் திரையரங்குகளில் புயலெனப் புறப்படவிருக்கும் இப்படத்தின் டிரெய்லர் வெளியீட்டு விழா, படக்குழுவினரின் நெகிழ்ச்சியானப் பகிர்வுகளுடன் கோலாகலமாகக் கொண்டடப்பட்டது.

விழாவில் ஒலித்த முதன்மை உரைகளின் தெறிப்புகள்:

• தயாரிப்பாளர் ஜித்தேஷ் விஸ்வாம்பரன்: “எளிய மனிதர்களின் வாழ்க்கையிலுள்ள நுட்பமான எத்தனையோ விஷயங்களுக்குப் படம் வழிகாட்டியாக அமையும். ராமேஸ்வரம் மக்களின் ஈடற்ற உழைப்பும் படக்குழுவின் வியர்வையும் இதில் கலந்திருக்கிறது.”

• நடிகர் கான்ஸ்டபிள் சுந்தரம்: “துணை நடிகராகப் பயணித்த எனக்கு இந்த அரிய வாய்ப்பை வழங்கிய இயக்குநருக்கு நன்றி. கருணாஸ் அண்ணன் எவ்வித அலட்டலுமின்றி இயல்பாகப் பழகி வழிகாட்டினார்.”

• நடிகர் பிரதீப்: “மிகவும் நேர்த்தியாக உருவான படைப்பு. வாய்ப்பளித்த இயக்குநர், தயாரிப்பாளர், அண்ணன் கருணாஸுக்கு மனமார்ந்த நன்றிகள்.”

• நடிகர் தர்ஷன்: “இதில் எழுத்தாளர் பாத்திரம் எனக்கு. பங்கேற்ற சர்வதேசத் திரைவிழாக்கள் அனைத்திலும் விருதுகளைக் வாரிக்குவித்த இத்திரைப்படம், மக்களிடமும் மிகப்பெரிய வெற்றியைப் பெறும்.”

• நடிகை நிரோஷா: “நடிப்பின் சாயலே தெரியாத அளவுக்கு இயல்பான நடிப்பை வெளிக்கொண்டு வந்தார் இயக்குநர். உங்கள் ஆதரவை எதிர்நோக்குகிறோம்.”

• நடிகர் கவி: “அனைத்துலக மேடைகளில் விருதுகளை அள்ளிய இத்திரைப்படத்தைச் சொந்த மண்ணில் மக்களுடன் சேர்ந்து கொண்டாடும் அந்தத் தருணத்திற்காகவே காத்திருந்தோம்.”

• நடிகர் பாண்டி: “பசங்க, கோலி சோடா படங்களைத் தாண்டி என் அடையாளத்தைப் பேசவைக்கும் படமாக இது அமையும்.”

• நடிகை சாஷா: “நாயகனின் தங்கை மணிமேகலை பாத்திரத்தில் வாழ்ந்திருக்கிறேன். கிராமத்து நாயகியாக நடிக்க வேண்டும் என்ற கனவு ராமேஸ்வர மண் பின்னணியில் நனவாகியுள்ளது. பதின்மூன்று சர்வதேச விருதுகளை வென்ற இப்படத்திற்கு உங்கள் ஆதரவு தேவை.”

• இயக்குநர் சஜீவ் பழூர்: “சின்னச் சின்னக் கருக்களிலிருந்து கிளைத்தெழுந்த கதைகள்தான் ‘நடுவுல கொஞ்சம் பக்கத்த காணோம்’, ‘சூது கவ்வும்’ போன்ற படங்கள். தமிழ் மொழி மீதான அளப்பரிய காதலால் ‘என்ன விலை’ படத்தை உருவாக்கியுள்ளேன்.”

உணர்ச்சிப்பூர்வமாகப் பேசிய நடிகர் கருணாஸ்:

கடந்த இரண்டாயிரத்தொன்று ஆம் ஆண்டு ராமேஸ்வரத்துப் பெருமண்ணில் பாலா அண்ணனின் இயக்கத்தில் ‘லொடுக்கு பாண்டி’ பாத்திரத்தில் எனது திரைப்பயணம் கிளர்ந்தெழுந்தது. அன்றிலிருந்து மலையாளத் திரை உலகைப் பெருவிருப்பத்தோடு ரசித்து வந்த எனக்கு, அங்குள்ள சிறந்த எழுத்தாளர்கள், இயக்குநர்கள், தொழில்நுட்பக் கலைஞர்களோடு இணைந்து ஆகச்சிறந்த ஒரு படத்திலாவது பணியாற்ற வேண்டும் என்ற பெருங்கனவு இருந்தது. அது இப்போது மெய்ப்பட்டிருக்கிறது.

இப்படம் முழுக்க முழுக்க எளிய சாமானிய மனிதர்களின் கதையைப் பேசுவது. அதனாலேயே இயக்குநர் இயல்பான நடிகர்களைத் தேர்வு செய்து மெருகேற்றியுள்ளார். இன்றைக்கு எனக்குப் பெரிய வர்த்தக சந்தை மதிப்பு இல்லையென்றாலும், கதையின் மீதுள்ள அளப்பரிய நம்பிக்கையால் தயாரிப்பாளர்கள் ஏழு கோடி ரூபாய் முதலீடு செய்துள்ளனர். இந்தியச் சினிமா இதுவரை தொட்டுப் பார்க்காத, கேட்கத் தயங்கிய ஒரு கேள்வியை இயக்குநர் சஜீவ் இதில் ஆணித்தரமாக எழுப்பியுள்ளார். என் இருபதாண்டு காலக் கலைத் தாகத்தை இந்தப் படம் முழுமையாகத் தணித்திருக்கிறது.

வழக்கறிஞர் பாத்திரத்தில் நிமிஷா பிரமாதப்படுத்தியுள்ளார். வெளியீட்டிற்கு முன்பே நெட்ஃபிலிக்ஸ் போன்ற முன்னணித் தளம் வாங்கி இருப்பது பெரிய பெருமிதம். ‘நந்தா’ திரைப்படத்திற்குப் பிறகு என் இதயத்திற்கு மிகவும் நெருக்கமான படம் இதுவே. இத்தனை ஆண்டு கால என் நடிப்பு வாழ்க்கையில், என் மனைவி முதன்முறையாக இத்திரைப்படத்தைப் பார்த்துவிட்டுதான் நேரில் பாராட்டினார். நிமிஷா மேடமும் என் நடிப்பைப் பார்த்து மெய்சிலிர்த்து கட்டிப்பிடித்து கன்னத்தில் முத்தமிட்டார். நிச்சயம் இந்தப் படமும் என் பாத்திரமும் மக்கள் மனதில் நீங்காத இடம் பிடிக்கும்.