விஜய் சேதுபதி – பூரி ஜெகன்நாத் கூட்டணியின் ‘ஸ்லம் டாக்’ படப்பிடிப்பு நிறைவு!

‘மக்கள் செல்வன்’ விஜய் சேதுபதியும் அதிரடித் திரைக்கதைக்குச் சொந்தக்காரரான இயக்குநர் பூரி ஜெகன்நாத்தும் முதன்முறையாகக் கைகோத்துள்ள ‘ஸ்லம் டாக்: 33 டெம்பிள் ரோடு’ (Slum Dog: 33 Temple Road) திரைப்படத்தின் படப்பிடிப்பு வெற்றிகரமாக முடிவடைந்தது. ஹைதராபாத்தில் விறுவிறுப்பாக நடைபெற்று வந்த இறுதிக்கட்டப் படப்பிடிப்பு முழுமையாக நிறைவுற்றதை அடுத்து, திரையரங்கு வெளியீட்டை நோக்கிப் படக்குழுவினர் அடுத்தகட்டப் பாய்ச்சலைத் தொடங்கியுள்ளனர்.

பூரி கனெக்ட்ஸ் சார்பில் பூரி ஜெகன்நாத் மற்றும் சார்மி கவுர் இணைந்து பெரும் பொருட்செலவில் தயாரித்துள்ள இத்திரைப்படம், தொடக்கம் முதலே சினிமா ரசிகர்களிடையே மாபெரும் எதிர்பார்ப்பை கிளப்பி வருகிறது. பூரி ஜெகன்நாத்தின் அதிரடியான வேகமும், விஜய் சேதுபதியின் அசாத்தியமான நடிப்புத் திறனும் இணைந்துள்ளதால், அனைத்துத் தரப்பு ரசிகர்களையும் கவரும் வகையில் ஒரு செறிவான திரையனுபவமாக இப்படம் உருவாகியுள்ளது.

ஏற்கெனவே வெளியாகியுள்ள கதாபாத்திர அறிமுகக் காணொளிகளும், விளம்பரப் பொருட்களும் படத்தின் மீதான ஆர்வத்தை மேலும் கூட்டியுள்ளன. இப்படத்தில் விஜய் சேதுபதிக்கு ஜோடியாக சம்யுக்தா நடிக்க, தபு, துனியா விஜய், ஜரினா வஹாப், பிரம்ஹாஜீ மற்றும் வி.டி.வி. கணேஷ் எனப் பெரு நட்சத்திரப் பட்டாளமே முக்கியக் கதாபாத்திரங்களில் நடித்துள்ளனர். ஒவ்வொரு கதாபாத்திரத்திற்கும் படத்தில் தனித்துவமான முக்கியத்துவம் கொடுக்கப்பட்டிருப்பது ஏற்கெனவே வெளியானக் காட்சிகளின் மூலம் தெளிவாகத் தெரிகிறது.

தொழில்நுட்ப ரீதியாகவும் பலமான கூட்டணியுடன் உருவாகியுள்ள இப்படத்திற்கு ஹர்ஷவர்தன் ராமேஸ்வர் இசையமைக்க, சாம் கே. நாயுடு ஒளிப்பதிவையும், சந்தோஷ் நூஜில்லா படத்தொகுப்பையும் மேற்கொண்டுள்ளனர். விFX பணிகளை அனில் பாடூரியும், தயாரிப்பு நிர்வாகப் பொறுப்புகளை நிறுவனத்தின் CEO விஷ்ணு ரெட்டியும் கவனித்துள்ளனர். தமிழ், தெலுங்கு, மலையாளம், கன்னடம் மற்றும் இந்தி என ஐந்து மொழிகளில் பிரம்மாண்ட பான்-இந்தியத் திரைப்படமாக வெளியாகவுள்ள இப்படத்தின் விளம்பரப் பணிகள் தற்போது முழு வீச்சில் முடுக்கப்பட்டுள்ளன. விரைவில் இப்படத்தின் அதிகாரப்பூர்வத் திரையரங்க வெளியீட்டுத் தேதி அறிவிக்கப்படவுள்ளது.