‘மூன்வாக்’ : இசை மத்தாப்பு.. சிரிப்பு வெடியும் தீபாவளி ரிலீஸ்!

பிஹைண்ட்வுட்ஸ் புரொடக்ஷன்ஸ் நிறுவனத்தின் தயாரிப்பில் உருவாகியுள்ள ‘மூன்வாக்’ திரைப்படம், வருகிற தீபாவளிப் பண்டிகையை முன்னிட்டு உலகம் முழுவதும் திரையரங்குகளில் வெளியாகிறது. நடனப் புயல் பிரபுதேவா மற்றும் இசைப்புயல் ஏ.ஆர். ரஹ்மான் ஆகியோரின் அபாரமான கூட்டணியில் உருவாகியுள்ள இத்திரைப்படம், ரசிகர்களுக்கு மறக்க முடியாத குடும்பக் கொண்டாட்ட அனுபவத்தைத் தரும் என எதிர்பார்க்கப்படுகிறது.

பிரபுதேவா கதாநாயகனாக நடித்துள்ள இத்திரைப்படத்தில், யோகி பாபு, அஜு வர்கீஸ், அர்ஜுன் அசோகன், சாட்ஸ், நிஷ்மா, சுஷ்மிதா, ரெடின் கிங்ஸ்லி, மொட்டை ராஜேந்திரன், லொள்ளு சபா சுவாமிநாதன், டாக்டர் சந்தோஷ் ஜேக்கப், தீபா சங்கர் மற்றும் ராம்குமார் நடராஜன் எனப் பெரிய நட்சத்திரப் பட்டாளமே இணைந்து நடித்துள்ளனர். இவர்களுடன் இசைஅமைப்பாளர் ஏ.ஆர். ரஹ்மான் ஜாலியான சிறப்புத் தோற்றத்தில் நடிகராக அறிமுகமாகிறார். மேலும், நடிகர் யோகி பாபு பதினாறு வித்தியாசமான கதாபாத்திரங்களில் தோன்றுவது படத்தின் மற்றொரு பிரம்மாண்ட சிறப்பம்சமாகும்.

நகையும், இசையும், நடனமும் தடையின்றி இணைந்த இந்தக் கலகலப்பான கதைக்களத்தைப் பிஹைண்ட்வுட்ஸ் நிறுவனத்தின் நிறுவனர் மனோஜ் என்.எஸ் எழுதி இயக்கியுள்ளார். தீபாவளி திருவிழா குடும்பங்களை ஒன்று சேர்ப்பது போல, இத்திரைப்படமும் குடும்பங்கள் அனைவரும் ஒன்றாக இணைந்து சிரித்து மகிழும் ஒரு புத்துணர்ச்சியூட்டும் அனுபவத்தைக் கொடுக்கும் என இயக்குநர் உறுதியளித்துள்ளார்.

ஏற்கனவே இப்படத்திலிருந்து வெளியான பாடல்கள் உலகெங்கிலும் உள்ள இசைப் பிரியர்களிடையே மிகப்பெரிய வரவேற்பைப் பெற்றுள்ளன. அதனைத் தொடர்ந்து, ஏ.ஆர். ரஹ்மான் மற்றும் பிரபுதேவா இணைந்து நடித்துள்ள நான்காவது பாடல் விரைவில் வெளியாகவுள்ளது. அனூப். வி. ஷைலஜா ஒளிப்பதிவு செய்ய, சேகர் வி.ஜே மற்றும் பியூஷ்-ஷாஜியா நடன இயக்கம் செய்துள்ளனர். ஷனூ கலை இயக்குநராகவும், திவ்யா ஜார்ஜ் மற்றும் ஸ்வேதா ராஜு ஆடை வடிவமைப்பாளர்களாகவும் பணியாற்றியுள்ளனர்.

மனோஜ் என்.எஸ், திவ்யா மனோஜ் மற்றும் பிரவீன் எலக் ஆகியோர் இணைந்து தயாரித்துள்ள ‘மூன்வாக்’ திரைப்படம் தமிழ், தெலுங்கு மற்றும் ஹிந்தி ஆகிய மொழிகளில் ஒரே நேரத்தில் வெளியாகிறது. படத்தின் சர்வதேச திரையரங்கு விநியோக உரிமையை ரோமியோ பிக்சர்ஸ் நிறுவனமும், இசை உரிமையை லஹரி நிறுவனமும் பெற்றுள்ளன. திரையரங்குகளைக் கொண்டாட்டமாக மாற்ற வரும் இத்திரைப்படம், அனைத்து வயதுப் பிரிவு பார்வையாளர்களுக்கும் மிகச்சிறந்த தீபாவளி விருந்தாக அமையும்.