Meiyazhagan: படத்தின் நீளம் குறைப்பு! இயக்குநர் பிரேம்குமார் அறிவிப்பு!

கார்த்தி நடித்துள்ள மெய்யழகன் திரைப்படத்தில் 18 நிமிட காட்சிகளை படக்குழு நீக்கியுள்ளது.

பிரேம்குமார் இயக்கத்தில் விஜய்சேதுபதி – த்ரிஷா நடித்து கடந்த 2018-ம் ஆண்டு வெளிவந்த ‘96’  திரைப்படம் பெரும் வரவேற்பைப் பெற்றது. ஆறு வருடங்களுக்குப் பிறகு பிரேம்குமார்  கார்த்தி, அரவிந்த்சாமி, ஸ்ரீதிவ்யா, இளவரசு உள்ளிட்டோரை வைத்து மெய்யழகன் படத்தை இயக்கி உள்ளார்.

இத்திரைப்படம் ரசிகர்களிடம் வரவேற்பைப் பெற்றுள்ளது.  வெளியூரிலிருந்து சொந்த ஊருக்கு வரும் அரவிந்த் சுவாமிக்கும், உள்ளூரிலிருக்கும் கார்த்திக்கும் இடையேயான உறவைப் பழைய நினைவுகளுடன் பேசும் படமாக உருவாகியுள்ளதால், படத்தில் இடம்பெற்ற பல காட்சிகள் ரசிகர்களை கவர்ந்து வருகின்றன. மறந்துபோன உறவுகளை, உணர்வுகளை மீட்டெடுப்பதாக படம் உள்ளளது என பலரும் நெகிழ்கின்றனர்.

அதே நேரம், படத்தின் நீளம்  , 2 மணிநேரம் 57 நிமிடம் என்பது அதிகமாக  உள்ளதாகவும் பலர் கருத்து தெரிவித்தனர்.

இந்நிலையில், படத்திலிருந்து 18 நிமிட காட்சிகளை படக்குழு நீக்கியுள்ளதாக  இயக்குநர் பிரேம்குமார் தெரிவித்து உள்ளார்.

இது குறித்து அவர் வெளியிட்டுள்ள அறிக்கையில்,  “அன்பால் உருவான மெய்யழகனுக்கு பேரன்பை அளித்து வரும் உங்கள் அனைவருக்கும் நன்றி. திரைமொழியின் வழக்கமான பாணியில் இருந்து விலகிய ஒரு திரை அனுபவத்திற்கு நீங்கள் தயாராக இருக்கிறீர்கள் என்ற நம்பிக்கையை விதைத்ததற்கு நன்றி. ஏராளமான அனுபவ பகிர்வுகள் இந்த படைப்பின் மீதான நம்பிக்கையை அதிகரித்திருக்கின்றன. மெய்யழகனை உணர்ந்து புரிந்துகொண்ட பெரும்பாலானோரின் அன்பும், ரசனையும் பிரமிக்க வைக்கின்றன.

படத்தின் நீளம் குறித்து மட்டும் சில அக்கறை குரல்கள் வெளிப்பட்டு வந்த நிலையில், ஒரு படைப்பாளியின் முதல் கடமை மக்களின் குரல்களுக்கு செவிமடுப்பது. எல்லோரது திருப்தியும் எனக்கு முக்கியம். அதுவே மெய்யழகனின் மீது நீங்கள் கொண்ட அன்பிற்கு நான் செய்யும் கைம்மாறு.

எனவே இன்று முதல் சில காட்சிகள் நீக்கப்பட்டு, 18 நிமிடங்கள் 42 நொடிகள் குறைக்கப்பட்டு, 2 மணி நேரம் 38 நிமிடங்களாக திரையிடல் தொடரும். மெய்யழகனின் நீளம் மட்டுமே குறைக்கப்பட்டிருக்கிறது. ஆனால் அவன் பேசும் அன்பும், திரை அனுபவமும் சற்றும் குறையவில்லை” என தெரிவித்துள்ளார்