‘கருப்பு பல்சர்’: நிஜமாகவே ஜல்லிக்கட்டில் காளையை அடக்கிய ‘கெத்து’ தினேஷ்!
‘லப்பர் பந்து’ படத்தின் பிரம்மாண்ட வெற்றிக்குப்பிறகு மதுரை கிராமத்து இளைஞனாகவும், சென்னை மாடர்ன் இளைஞனாகவும் இரண்டு மாறுபட்ட தோற்றங்களில் ‘கெத்து’ தினேஷ் அசத்தி இருக்கும் திரைப்படம், கருப்பு பல்சர்.
யாஷு என்டர்டெயின்மெண்ட் சார்பில், டாக்டர் சத்யா எம் தயாரிக்கும் இப்படத்தில் இயக்குநராக அறிமுகமாகிறார், முரளி கிரிஷ். இவர், பிரபல இயக்குநர் எம் ராஜேஷிடம் உதவி இயக்குநராக பணியாற்றியவர்.
படம் குறித்து இயக்குநர் முரளி கிரிஷ், “இப்படம் மக்கள் மனம் விட்டுச் சிரித்து மகிழும் வகையில் முழுக்க முழுக்க நகைச்சுவையுடன், ஒரு அசத்தலான கமர்ஷியல் படமாக இருக்கும்.
‘பொல்லவாதவன்’ பட கருப்பு பல்சர், மெரினாவில் நடந்த ஜல்லிக்கட்டு போராட்டம்… இந்த இரண்டும் தான் இப்படத்தின் கரு உருவாகக் காரணமாக இருந்தன. அதாவது, மதுரை பின்னணியில் கருப்பு காளையுடன் வாழும் ஒரு இளைஞனும், சென்னையில் பல்சருடன் வாழும் இளைஞனும் எதிர்பாராத விதமாக சந்திக்கும் போது அவர்கள் வாழ்வில் ஏற்படும் பிரச்சனைகள், அதை எப்படித் தாண்டி வருகிறார்கள் என்பது தான் கதை.
அசத்தலான காமெடியுடன், பரபர திருப்பங்களுடன், அனைவரும் ரசிக்கும் கமர்ஷியல் படமாக இப்படம் உருவாகியுள்ளது.
இந்தப்படத்தில் தினேஷின் உழைப்பு அபாரமானது. இரண்டு நாட்கள் ஜல்லிக்கட்டில் உண்மையாகவே மாடுகளைப் பிடித்தார். அப்போது அவருக்கு அடிபட்டது. அதையும் பொருட்படுத்தாமல் நடித்துத் தந்தார். இன்னொரு வேடத்தில், சென்னை இளைஞனாகவும் கலக்கியிருக்கிறார்” என்றார்.
இப்படத்தில் தினேஷூ்க்கு ஜோடியாக ரேஷ்மா வெங்கட், மதுனிகா நடித்துள்ளன்ர். இவர்களுடன், மன்சூர் அலிகான், கலையரசன் , சரவணன் சுப்பையா, பிரின்ஸ் அஜய், பிராங்க்ஸ்டர் ராகுல் ஆகியோர் முக்கிய கதாப்பாத்திரங்களில் தோன்றுகின்றனர்.
இப்படத்திற்கு இன்பராஜ் ராஜேந்திரன் பாடல் எழுதி இசையமைத்துள்ளார். பாஸ்கர் ஆறுமுகம் ஒளிப்பதிவு செய்துள்ளார். சசி தாட்ச எடிட்டிங் செய்ய, டி.உதயகுமார் சவுண்ட் டிசைன் செய்துள்ளார். கே.வி. தமிழரசு, முருகானந்தம் நிர்வாக தயாரிப்பு பணிகளைச் செய்துள்ளனர்.
இப்படத்தின் அனைத்து பணிகளும் முடிந்த நிலையில், தற்போது திரைக்குக் கொண்டு வரும் பணிகள் பரபரப்பாக நடந்து வருகிறது. விரைவில் டிரெய்லர், மற்றும் இசை வெளியீடு பற்றிய அறிவிப்புகள் அதிகாரப்பூர்வமாக வெளியாகும்.
