“ஹீரோயின் பற்றி டோன்ட் கேர்!”: ‘அர்ஜுனன் பேர் பத்து’ விழாவில் யோகி பாபு அதிரடி!

தமிழ் திரையுலகின் தவிர்க்க முடியாத நகைச்சுவை புயல் யோகி பாபுவின் 300-வது திரைப்படமாக உருவாகியிருக்கும் ‘அர்ஜுனன் பேர் பத்து’ படத்தின் பாடல்கள் மற்றும் டிரெய்லர் வெளியீட்டு விழா, சென்னை பிரசாத் லேப் திரையரங்கில் செம கெத்தாகவும் திருவிழா போலவும் நடந்து முடிந்தது!

தேவ் சினிமாஸ் சார்பில் கிருத்திகா தங்கப்பாண்டி மற்றும் D. தங்கப்பாண்டி இணைந்து தயாரித்துள்ள இப்படத்தை ரா. ராஜ்மோகன் எழுதி இயக்கியுள்ளார். எல். சுந்தரபாண்டி இணைத் தயாரிப்பு செய்ய, டி. இமான் இசையமைத்துள்ளார்.மேடையில் மாஸ் காட்டிய சிறப்பு விருந்தினர்கள் & படக்குழு!

விழாவின் தொடக்கமாக, தயாரிப்பாளர் தங்கப்பாண்டி அனைவரையும் இன்முகத்தோடு வரவேற்றுப் பேசினார்.

அவரைத் தொடர்ந்து இயக்குநர்கள் சுசீந்திரன், நித்திலன், ஷான், இயக்குநர் ரா. ராஜ்மோகன், இசையமைப்பாளர் டி. இமான், ஒளிப்பதிவாளர் பிரதீப் காளிராஜா, நாயகி அனாமிகா மஹி, மைனா நந்தினி, அருள்தாஸ், காளி வெங்கட், லெனின் பாரதி, சுப்பிரமணியம் சிவா, சென்ட்ராயன் எனத் திரை பட்டாளமே திரண்டு வந்து வாழ்த்துமழ பொழிந்தனர்.

இசையமைப்பாளர் இமான், யோகி பாபுவின் உழைப்பைப் பாராட்டிப் பேச, மற்ற கலைஞர்களும் யோகி பாபுவுடனான தங்களின் நட்பையும் அனுபவங்களையும் பகிர்ந்து கொண்டனர்.

விழாவில் ஆளுயர மாலையோடு மேடையேறிய கதைநாயகன் யோகி பாபு, தனது மனதில் உள்ளதை அணுவணுவாகப் பகிர்ந்து கொண்டார்:

“வாய்ப்பளித்த தயாரிப்பாளர்கள் தங்கபாண்டி, கீர்த்திகா மற்றும் இயக்குநர் ராஜ்மோகனுக்கு நன்றி. இது எனது 300-வது படம் என்று சொல்கிறார்கள். ஆனால், 300 என்கிற எண்ணிக்கையோடு நாம் நின்றுவிடக் கூடாது. நாகேஷ் சார், மனோரமா அம்மா போன்ற ஜாம்பவான்கள் போல நானும் நிறைய படங்கள் நடித்துப் பெரிதாக வளர வேண்டும்.

நான் 2016 லேயே நயன்தாரா கூட நடித்து விட்டேன். இனி யாருடன் நடிக்க வேண்டும் என்கிற கவலை இல்லை. எந்தக் கதாநாயகியுடனும் நடிக்க வேண்டும் என்ற கவலை இல்லை. நமக்குக் கதை தான் முக்கியம், கதாநாயகி அல்ல.இசையமைப்பாளர் இமான் சார் எனக்குப் பிடித்தவர். காளி வெங்கட், நித்திலன், உடன் நடித்த நடிகர்கள் மற்றும் தொழில்நுட்பக் கலைஞர்கள் அனைவருக்கும் நன்றி.

சினிமாத்துறைக்கு வெளியூரில் இருந்து வந்தவர்களுக்கு மட்டுமல்ல, சென்னையில் பிறந்த நமக்கும் கஷ்டம் தான். அதை 24 வருடங்களாக அனுபவித்துத் தெரிந்துகொண்டேன். லொள்ளு சபா, ஆர்ட் டைரக்ஷன் என நிறைய வேலைகள் பார்த்த பிறகே 2009-ல் யோகியாக உங்களுக்குத் தெரியவந்தேன்.

இயக்குநர் ராஜ்மோகன் சில ஆண்டுகளுக்கு முன் கதை சொல்லிவிட்டுப் பிறகு ஆளையே காணோம். மூன்று வருடங்களுக்கு முன் நானாகவே அவனுக்கு போன் செய்து அழைத்துத்தான் இந்தப் படத்தை தொடங்கினோம். நல்ல கதையோடு வரும் உதவி இயக்குநர்களுக்கு உதவி செய்ய நான் எப்போதும் தயாராக இருக்கிறேன்”  என்றார்.

“முருகனும் நகைச்சுவையும் தான் என் சொத்து!”

பிறகு, செய்தியாளர்களுடன் கலந்துரையாடிய யோகி பாபு, சுடச்சுடப் பதிலளித்தார்:

• கமலுடன் நடிக்கும் ஆசை: “யாருடன் நடிக்க வேண்டும் என்று கேட்டால், கமல் சாருடன் மட்டும் தான் இன்னும் நடிக்கவில்லை. விரைவில் நடிப்பேன் என்று நம்புகிறேன்.”

• வெற்றி ரகசியம்: “300 படங்கள் வரை வந்திருப்பதற்குத் தெய்வ பக்திதான் காரணம். நான் கும்பிடும் அந்த முருகன்தான் அதற்குக் காரணம். எனக்கு முருகன் மேல் பெரிய நம்பிக்கை உண்டு.”

• நகைச்சுவை தான் சோறு: “நான் எந்த பிரேமில் தலை காட்டினாலும் என்னை ஒரு நகைச்சுவை நடிகராகத்தான் பார்க்கிறார்கள். நகைச்சுவை வேடங்கள் தான் எனக்குச் சோறு போடுகிறது. அதை முதலில் நான் திருப்தி செய்ய வேண்டும். அதனால் அதை நிறுத்த மாட்டேன். சில படங்களில் லீடு என்று முன்னணிப் பாத்திரங்களில் என்னைப் பயன்படுத்திக் கொள்கிறார்கள், அவ்வளவுதான். மற்றபடி நான் ஒரு நகைச்சுவை நடிகராகத் தான் என் காலத்தை ஓட்டுகிறேன். என்னை ஆதரித்து வரும் ரசிகர்களுக்கு நன்றி. அவர்களுக்கு நான் இன்னும் படங்களின் மூலம் கொடுக்க வேண்டும், நிச்சயம் செய்வேன்.”

கொண்டாட்டம்!

விழாவின் இறுதியில், அர்ஜுனன் பேர் பத்து படத்தின் டிரெய்லர் மற்றும் பாடல்கள் கோலாகலமாக வெளியிடப்பட்டன. யோகி பாபுவின் 300-வது மைல்கல்லைக் கொண்டாடும் விதமாகத் தயாரிப்பாளர் அவருக்கு ஆளுயர மாலை அணிவித்து, மேடையிலேயே கேக் வெட்டி விழாவை இனிதே நிறைவு செய்தனர்.

பிரதீப் காளிராஜாவின் ஒளிப்பதிவு, மு. காசி விஸ்வநாதனின் படத்தொகுப்பு, எம். ஆர். அருண் சந்தரின் வசனம், B. சேகரின் கலை இயக்கம் மற்றும் ஓம் பிரகாஷின் சண்டைப்பயிற்சியில் உருவாகியுள்ள ‘அர்ஜுனன் பேர் பத்து’ திரைப்படம் ஜூலை 17-ஆம் தேதி உலகமெங்கும் திரைக்கு வருகிறது!