கூடு” தாய்மைக்கு மரியாதை.. ஒரு பறவைக்காக 35 நாட்கள் மின்வெட்டை ஏற்படுத்திக்கொண்ட கிராமம்!

கிராமத்து மண்வாசனை, நெகிழ வைக்கும் உண்மைச் சம்பவம், கூடவே வயிறு குலுங்கச் சிரிக்க வைக்கும் நகைச்சுவை என ஒரு முழுமையான விருந்தாகத் தயாராகி வருகிறது ‘கூடு’ திரைப்படம்! பாலிவுட்டின் முன்னணித் தயாரிப்பு நிறுவனமான பனோரமா ஸ்டுடியோஸ், ஸ்கைமூன் என்டர்டெயின்மென்ட் மற்றும் கல்ட் டிஜிட்டல் ஆகிய நிறுவனங்களுடன் கைகோர்த்துத் தனது தமிழ்த் திரைப்படப் பட்டியலைப் பிரம்மாண்டமாக விரிவுபடுத்தியுள்ளது. குமார் மங்கட் பதக், அபிஷேக் பதக், எம். கணேஷ், சூனில் ஜெயின், ஆதித்யா ஜோஷி மற்றும் லிஷா P. சந்திரன் ஆகியோர் இணைந்து தயாரித்துள்ள இப்படத்தை, அறிமுக இயக்குநர் ஜோயல் விஜய் இயக்கியுள்ளார்.

ஒரு கூடும், ஒரு கிராமத்தின் அசாத்தியத் தியாகமும்!

தமிழ்நாட்டின் ஒரு அழகிய கிராமத்தில் நடந்த வியப்பூட்டும் உண்மைச் சம்பவம்தான் இப்படத்தின் ஆன்மா. ஊருக்கு வெளிச்சம் தரும் மின்மாற்றிக்குள் (Transformer) அரிய வகைப் பறவை ஒன்று கூடுகட்டி முட்டையிடுகிறது. மின்சாரத்தை இயக்கினால் அந்தப் பறவையின் கூடும், அதிலிருக்கும் உயிர்களும் அழிந்துவிடும் என்ற இக்கட்டான சூழல் ஏற்படுகிறது. அப்போது அந்த ஒட்டுமொத்த கிராமமும் எடுத்த முடிவுதான் உலகையே திரும்பிப் பார்க்க வைத்தது! அந்தப் பறவையின் முட்டைகள் பொரிந்து, குஞ்சுகள் பாதுகாப்பாகப் பறந்து செல்லும் வரை, தொடர்ந்து முப்பத்தைந்து நாட்களுக்குத் தங்கள் ஊரில் மின்சாரத்தையே பயன்படுத்தாமல் இருளில் வாழத் தாங்களாகவே முன்வருகின்றனர். வழக்கமான சினிமா ஹீரோயிசத்தைத் தாண்டி, சாதாரண மனிதர்களின் அன்பும் ஒற்றுமையும்தான் உண்மையான கதாநாயகத்தன்மை என்பதை இப்படம் அழுத்தமாகவும் சுவாரசியமாகவும் சொல்ல வருகிறது.

நட்சத்திரப் பட்டாளமும், மண்வாசனை மாறாத படப்பிடிப்பும்!

கதையின் நம்பகத்தன்மைக்காகப் படத்தின் பெரும்பாலான காட்சிகள் உண்மையான கிராமப்புற இடங்களிலேயே படமாக்கப்பட்டுள்ளன. திரையில் கலகலப்பையும் உணர்ச்சியையும் அள்ளித் தெளிக்கத் தமிழ் சினிமாவின் திறமையான கலைஞர்கள் அணிவகுத்துள்ளனர். VJ கதிரவன், ஜெயப்பிரகாஷ், விவேக் பிரசன்னா, தேவிகா சதீஷ், ரச்சிதா மகாலட்சுமி, நமோ நாராயணா, ஷா ரா, சார்லஸ் வினோத், அனிதா சம்பத், சசி செல்வராஜ், திராவிட் செல்வம், VJ ஆஷிக் மற்றும் தனலட்சுமி எனப் பெரிய நட்சத்திரப் பட்டாளமே இதில் இணைந்துள்ளது. இவர்களின் எதார்த்தமான நடிப்புக்கு, மனோஜ் கிருஷ்ணாவின் இசை மேலும் உயிரூட்டியுள்ளது.

தயாரிப்பாளர்களின் நெகிழ்ச்சிப் பார்வை!

வித்தியாசமான கதைகளைத் தேடும் தங்களுக்கு, உண்மைச் சம்பவத்தையும் மனிதநேயத்தையும் அழகாக இணைத்த ‘கூடு’ கதை மிகவும் பிடித்துவிட்டதாகப் பனோரமா ஸ்டுடியோஸ் தலைவர் குமார் மங்கட் பதக் உற்சாகத்துடன் தெரிவித்துள்ளார். “மற்றொரு உயிரைக் காக்க நாம் செய்யும் சிறிய தியாகம்கூடப் பெரிய அர்த்தம் கொண்டது என்பதை இப்படம் நினைவூட்டும்” என நிர்வாக இயக்குநர் அபிஷேக் பதக் நெகிழ்ந்துள்ளார். அதேபோல், சிறிய செயல்கள் மூலம் உருவாகும் பெரிய மாற்றங்களைக் கொண்டாடும் இப்படம் உலகம் முழுவதும் உள்ள ரசிகர்களின் மனதைத் தொடும் என ஸ்கைமூன் என்டர்டெயின்மென்ட் எம். கணேஷ் மற்றும் கல்ட் டிஜிட்டல் ஆதித்யா ஜோஷி ஆகியோரும் நம்பிக்கை தெரிவித்துள்ளனர்.

ராஜேஷ் மேனன் இணைத் தயாரிப்பிலும், அபினவ் மெஹ்ரோத்ரா கிரியேட்டிவ் தயாரிப்பிலும் உருவாகியுள்ள இப்படத்தை, பனோரமா ஸ்டுடியோஸ் உலகளாவிய அளவில் வெளியிடுகிறது.

மனிதநேயமும் கருணையும் கொண்டாடப்படும் இந்த அழகான திரை அனுபவத்தை ரசிக்கத் தயாராகுங்கள்! ‘கூடு’ – விரைவில் உங்கள் அபிமானத் திரையரங்குகளில்!