‘அயலி’ நாயகியின் அன்பு: பெண் ஆட்டோ ஓட்டுநர்களுக்கு உதவிகளை வழங்கிய அனுமோல்!

விஜயதசமி எனும் புனித நாளில், குடும்ப சுமையைத் தோளில் சுமந்து இரவு பகலாக ஆட்டோ ஓட்டும் ஐம்பது வீரப் பெண் ஓட்டுநர்களுக்கு, பிரபல நடிகை அனுமோல் நலத்திட்ட உதவிகளை வழங்கிச் சிறப்பித்துள்ளார்!

‘அயலி’ நாயகியின் அன்பான செயல்: ‘அயலி’ வெப் தொடர் மூலம் மக்கள் மனதில் ஆழப் பதிந்தவர் நடிகை அனுமோல். ‘எல்லோரும் சமம்’ என்ற கொள்கையைக் கொண்ட இவர், தன்னைப் பார்க்கும் ரசிகர்களிடம் எப்போதும் ‘Always Choose Kindness’ என்றுதான் ஆட்டோகிராப் போடுவார். சமூகத்தின் மீது எப்போதும் தனி அக்கறை காட்டும் அனுமோல், இப்போது மீண்டும் ஒரு அழகான செயலால் அனைவரின் அன்பையும் வென்றுள்ளார்.

ரசிகர்களின் யோசனை – அனுமோலின் சம்மதம்: சமீபத்தில் அனுமோலைச் சந்தித்த அவரது ரசிகர்கள், “பெண்களின் சக்தியைக் கொண்டாடும் இந்த நவராத்திரி நாளில், சொந்தக் காலில் நிற்கும் உழைப்பாளிப் பெண்களுக்குப் பரிசளித்துக் கௌரவிக்கலாம்” என்று ஒரு சூப்பர் யோசனையைக் கூறினார்கள். கேட்ட உடனே, யோசிக்காமல் டக்கென்று சம்மதம் சொன்னார் அனுமோல்!

கொளத்தூரில் நடந்த நெகிழ்ச்சி விழா: சென்னை கொளத்தூரில் உள்ள ஸ்ரீ செல்வ லட்சுமி திருமண மண்டபத்தில் இந்த விழா களைகட்டியது. தேர்வு செய்யப்பட்ட பெண் ஆட்டோ ஓட்டுநர்கள் அனைவரும் உற்சாகத்தோடு கலந்துகொண்டனர். அவர்களுக்குப் பரிசுகளை வழங்கிய அனுமோல், மேடையில் பேசிய வார்த்தைகள் ஒவ்வொன்றும் அனைவரின் இதயத்தையும் தொட்டது:

“குடும்பத்துக்காகவும், சுயமரியாதைக்காகவும் எந்த நேரத்திலும் பயமில்லாமல் ஆட்டோ ஓட்டும் உங்கள் தன்னம்பிக்கை மிகப்பெரியது! பெண்கள் பொருளாதார சுதந்திரம், நல்ல ஆரோக்கியம், கல்வி பெற வேண்டும். யாராவது உங்களை உருவத்தாலோ, நிறத்தாலோ, மொழியாலோ தாழ்த்திப் பேசினால், அதை அப்படியே கடந்துபோய் உங்கள் இலக்கை நோக்கி உறுதியோடு ஓடுங்கள்!”

உள்ளம் நெகிழ்ந்த ஓட்டுநர் பவானி: பரிசுகளைக் கொடுத்ததோடு நிறுத்தாமல், ஒவ்வொருவரிடமும் நேரில் சென்று அவர்களின் குடும்பச் சூழலைக் கேட்டறிந்தார் அனுமோல்.

நிகழ்ச்சியில் பங்கேற்ற பவானி என்ற பெண் ஓட்டுநர் நெகிழ்ச்சியோடு பேசுகையில், “நிறைய பேர் உதவி பண்ணியிருக்காங்க, ஆனா எங்களோட நிஜமான தேவையைப் புரிஞ்சுகிட்டு வாட்டர் பாட்டில், நாப்கின், பவர் பேங்க், முதலுதவிப் பெட்டினு பார்த்துப் பார்த்துத் தந்திருக்காங்க. சுவையான உணவும் கொடுத்து எங்களை ரொம்ப அன்பா உபசரிச்சாங்க. வாழ்க்கையிலேயே இதை மறக்க முடியாது… ஐ லவ் யூ மேடம்!” என்று ஆனந்தக் கண்ணீருடன் கூறினார்.