ஜி.பிராகாஷூக்கு ‘இம்மார்ட்டல்’ இன்ப அதிர்ச்சி!

ஜிவி பிரகாஷ் – கயாடு லோஹர் காம்பினேஷனில், மாரியப்பன் சின்னா இயக்கத்தில் வெளியான ‘இம்மார்ட்டல்’ திரைப்படம் திரையரங்குகளில் ரசிகர்களின் பெரும் வரவேற்பைப் பெற்று அதிரடி வெற்றிநடை போட்டு வருகிறது!

ஏகே ஃபிலிம் ஃபேக்டரி தயாரிப்பில், சாம் சிஎஸ் இசையில் கடந்த செப்டம்பர் 4-ஆம் தேதி வெளியான இந்த ஃபேண்டஸி த்ரில்லர் திரைப்படத்தில் டிஎம் கார்த்திக், குமார் நடராஜன், லொள்ளு சபா மாறன் மற்றும் ஆதித்யா கதிர் எனப் பெரிய நட்சத்திரப் பட்டாளமே நடித்துள்ளனர்.

த்ரில் கிளப்பும் சுவாரஸ்யக் கதைக்களம்: ஒரே வீட்டில் வாடகைக்குக் குடியிருக்கும் ஜிவி பிரகாஷும் கயாடு லோஹரும் காதலிக்கத் தொடங்குகிறார்கள். ஆனால், அந்த காதல் ஜிவி பிரகாஷை அந்த வீட்டை விட்டே வெளியே செல்லவிடாமல் தடுத்து நிறுத்துகிறது. அதற்கான மர்மமான காரணத்தைத் தேடிப் புறப்படும் ஜிவி பிரகாஷ், இறுதியில் ஒரு பயங்கரமான கொடிய மிருகத்தைச் சந்திக்கிறார்.

அந்த கொடூர மிருகம்தான் கயாடு லோஹராக உருமாறித் தன்னை முழுமையாக ஆட்கொள்ளத் துடிக்கிறது என்ற அதிர வைக்கும் உண்மையை அவர் கண்டறிகிறார்! அந்த ஆபத்தான வீட்டை விட்டு ஜிவி பிரகாஷ் தப்பித்தாரா, இல்லையா? என்பதே ரசிகர்களின் நரம்புகளை முறுக்கேற்றும் இப்படத்தின் மீதிக்கதையாகும். இந்த முற்றிலும் புதிய, வித்தியாசமான கதைக்களம் ரசிகர்களை வெகுவாகக் கவர்ந்து திரையரங்குகளில் கைதட்டல்களைப் பெற்று வருகிறது.

விழாவில் தூள் கிளப்பிய மாஸ் பரிசுகள்! படத்திற்கு கிடைத்த அமோக வெற்றியைத் தொடர்ந்து, படக்குழுவினர் அண்மையில் கோலாகலமாக ‘நன்றி தெரிவிக்கும் விழா’வை நடத்தினர். இந்த விழாவில் தான் அந்த எதிர்பாராத சுவாரஸ்யம் காத்திருந்தது!

படத்தின் பிரம்மாண்ட வெற்றியால் மகிழ்ச்சியடைந்த தயாரிப்பாளர், கதாநாயகன் ஜிவி பிரகாஷுக்கு மேடையிலேயே ஒரு பிராண்டட் புதிய கடிகாரத்தையும், பைக்கர்களின் கனவு வாகனமான யமஹா ஆர்.எக்ஸ்.100 (Yamaha RX 100) பைக்கையும் சர்ப்ரைஸ் பரிசாக வாரி வழங்கினார்!

சற்றும் எதிர்பாராத இந்த மாஸ் பரிசைக் கண்டு இன்ப அதிர்ச்சியடைந்த ஜிவி பிரகாஷ், மிகுந்த மகிழ்ச்சியோடும் புன்னகையோடும் அந்தப் பரிசுகளை ஏற்றுக்கொண்டார். திரையில் த்ரில்லர் விருந்து படைத்த ‘இம்மார்ட்டல்’ படக்குழு, நிஜ வாழ்விலும் இந்த வெற்றியை செம கெத்தாகக் கொண்டாடி மகிழ்ந்துள்ளது!