‘சூப்பர் சுப்பு’ : நெட்ஃப்ளிக்ஸில் காமெடி கெடா விருந்து!

தெலுங்கு திரையுலகின் ஸ்டைலிஷ் நடிகர் சந்தீப் கிஷன், சமூக வலைதளங்களில் கலக்கும் மிதிலா பால்கர் மற்றும் அனுபவமிக்க முரளி சர்மா கூட்டணியில், நெட்ஃப்ளிக்ஸ் தனது முதல் தெலுங்கு நகைச்சுவை தொடரான ‘சூப்பர் சுப்பு’வை களமிறக்குகிறது.

இந்தக் கதையின் நாயகன் சுப்பிரமணியம் என்கிற சுப்பு, மாகிபூர் என்ற கிராமத்திற்கு ஆசிரியராகப் பணியில் சேர்கிறார். அங்கு அவருக்குக் கொடுக்கப்படும் பணிதான் கதையின் மையம்; கிராம மக்களுக்குப் பாலியல் கல்வி போதிக்க வேண்டும் என்பதுதான் அந்த சவாலான விஷயம். இதைச் செய்யப் போய் அவர் சிக்கிக்கொள்ளும் நகைச்சுவைச் சிக்கல்களும், எதிர்பாராத திருப்பங்களுமே இந்தத் தொடரின் ஹைலைட்!

இந்தத் தொடர் குறித்து படக்குழுவினர் பகிர்ந்து கொண்ட துள்ளலான கருத்துகள்:

சந்தீப் கிஷன்: “சுப்பு ஒரு நல்ல எண்ணம் கொண்டவன், ஆனால் எதைச் செய்தாலும் அது ஒரு பெரிய பிரச்சினையில் போய் முடியும். அவன் அனுபவிக்கும் கலாட்டாக்கள், தந்தை மற்றும் கிராமத்து மக்களுடனான மோதல்கள் எனத் தொடர் முழுக்கச் சிரிப்புக்குக் குறைவிருக்காது.”

மிதிலா பால்கர்: “இது வெறும் நகைச்சுவை மட்டுமல்ல; மனித உறவுகள், புரிதல்கள் மற்றும் வாழ்க்கையின் அழகிய தருணங்களைப் பேசும் கதை. நெட்ஃப்ளிக்ஸின் பயணத்தில் மீண்டும் இணைந்ததில் மகிழ்ச்சி.”

முரளி சர்மா: “சமூகம் பேசத் தயங்கும் ஒரு விஷயத்தை, மிக இயல்பாகவும் கலகலப்பாகவும் கையாண்டிருக்கிறார்கள். மாகிபூர் கிராமத்தின் ஒவ்வொரு கதாபாத்திரமும் பார்வையாளர்களைக் கவரும்.”

மாலிக் ராம் இயக்கத்தில், சிலகா புரொடக்ஷன்ஸ் தயாரித்துள்ள இந்தத் தொடரில் பிரம்மானந்தம், கெட் அப் சீனு எனப் பெரும் நட்சத்திரப் பட்டாளமே நடித்துள்ளனர்.

சிரிப்புக்கும், சுவாரஸ்யத்திற்கும் பஞ்சமில்லாத ‘சூப்பர் சுப்பு’ ஜூலை இரண்டாம் தேதி முதல் நெட்ஃப்ளிக்ஸில் மட்டும் வெளியாகிறது. தயாரா இருக்கீங்களா?