வள்ளுவன்: ‘அற’ச் சீற்றம்!

திருக்குறள் என்றாலே நம் நினைவுக்கு வருவது ‘அறம், பொருள், இன்பம்’. ஆனால், இந்த ‘வள்ளுவன்’ திரைப்படத்திலோ தீமை கண்டு பொங்கும் அறச் சீற்றம் மையப்படுத்தப்பட்டு இருக்கிறது.

நாடு முழுவதும் இன்றைய காலகட்டத்தில் இளம் பெண்களுக்கும், பிஞ்சு குழந்தைகளுக்கும் எதிராக நடக்கும் கொடூரமான பாலியல் குற்றங்களே படத்தின் மையக்கரு. சட்டம்-ஒழுங்கு, காவல்துறை, நீதிமன்றம் என அனைத்தும் இருந்தும், இந்த அநீதிகளை ஏன் தடுத்து நிறுத்த முடிவதில்லை? சட்டத்தின் ஓட்டைகளைப் பயன்படுத்தி குற்றவாளிகள் எப்படித் தப்பிக்கிறார்கள் என்கிற கேள்வியை எழுப்புகிறது இத்திரைப்படம்.

“அநீதி நடக்கும்போது சட்டம் தன் கடமையைச் செய்யத் தவறினால், கொடியவர்களைக் கொல்வதே சரி” என்ற ஒரு தீவிரமான, விழிப்புணர்வூட்டும் அதே சமயம் விவாதத்திற்குரிய கருத்தை படம் பேசுகிறது. ஒரு மூத்த வழக்கறிஞர் மற்றும் கல்லூரி பேராசிரியர் குறிப்பிட்டது போல, ‘The reward of sin is death’ (பாவத்தின் சம்பளம் மரணம்) என்ற பைபிள் வரிகளைப் போல, குற்றவாளிகளுக்குக் கிடைக்கும் உடனடி மரணமே தீர்வு எனப் படம் ஜஸ்டிஃபை செய்கிறது.

நடிப்பு

கதாநாயகன் சேத்தன் சீனு, புதுமுகம் என்று சொல்ல முடியாத அளவுக்கு, சண்டைக் காட்சிகளிலும் சரி, எமோஷனல் காட்சிகளிலும் சரி, தன் சிறப்பான பங்களிப்பைத் தந்துள்ளார்.

நாயகி ஆஸ்னா சவேரியும் இயல்பான நடிப்பை அளித்து இருக்கிறார். முக்கியமாக, கிளைமாக்ஸில் கதாநாயகி எடுக்கும் அந்தத் துணிச்சலான முடிவு மற்றும் எதிர்பாராத ட்விஸ்ட் ரசிகர்களை அசர வைத்துள்ளது.

மனோபாலா, சாய் தீனா, தீபா, கராத்தே ராஜா, ராஜசிம்மன், மீசை ராஜேந்திரன் உள்ளிட்ட அனைவரும் பாத்திரம் அறிந்து நடிப்பை அளித்து உள்ளனர்.இசை 

அஸ்வத் இசையில் பாடல்களும் பின்னணி இசையும் ஈர்க்கின்றன. குறிப்பாக அதிரடி காட்சிகளுக்கு அவர் அளித்து இருக்கும் பின்னணி, பதட்டத்தை அதிகப்படுத்துகிறது. குறிப்பாக, அண்ணன்-தங்கை பாசத்தை விளக்கும் அந்த உருகவைக்கும் பாடல் மற்றும் ‘காடா சாங்’ போன்ற பாடல்கள் ரசிகர்களைக் கவர்ந்துள்ளன.

ஒளிப்பதிவு

சுரேஷ் பாலாவின் ஒளிப்பதிவு படத்துக்கு கூடுதல் பலம். படத்தின் எமோஷனல் மற்றும் ஆக்ஷன் காட்சிகளை யதார்த்தமாகப் படம்பிடித்துக் காட்டியுள்ளார்.

இயக்கம்

இயக்குநர் சங்கர் சாரதிக்கு இது மிக முக்கியமான படம். இலக்கியத்தில் ஆழ்ந்த ஈடுபாடும், பக்தியும் கொண்ட அவர், திருக்குறளை மையமாக வைத்து இன்றைய சமூக அவலத்தை அப்படியே திரையில் கடத்தியுள்ளார்.

பொழுதுபோக்கு, வீணான காமெடி, தேவையற்ற திசைதிருப்பல்கள் (Diversions) எதுவுமே இல்லாமல், தான் எடுத்துக்கொண்ட கருத்தில் மட்டுமே முழு கவனத்தையும் செலுத்தி, திரைக்கதையை மிக வேகமாக (Fast-paced) நகர்த்தியுள்ளார். ஒரு குடும்பப் படமாகவும், அதே சமயம் கொடியவர்களுக்கு எச்சரிக்கை விடுக்கும் ஒரு பாடமாகவும் இந்தத் திரைப்படத்தை இயக்கியுள்ளார்.

ஒரு பெண் குழந்தையை இழந்த தாயின் தவிப்பும், வலியும் திரையரங்கில் இருந்தவர்களைக் கண்கலங்கச் செய்துள்ளது.

பலம்:

• சமூக விழிப்புணர்வு: பெண் குழந்தைகளின் பாதுகாப்பு மற்றும் தற்போதைய சட்டம்-ஒழுங்கு நிலவரத்தை தைரியமாகப் பேசியிருப்பது.

• விறுவிறுப்பான திரைக்கதை: இரண்டரை மணி நேரம் போனதே தெரியாத அளவுக்கு ‘லேக்’ (Lag) இல்லாத வேகம்.

• கிளைமாக்ஸ் ட்விஸ்ட்: யாரும் எதிர்பார்க்காத வகையில் அமைக்கப்பட்ட இறுதிப் பகுதி.

பலவீனம்:

• பொழுதுபோக்கு அம்சங்களோ, காமெடியோ இல்லாததால், வெறும் கமர்ஷியல் படங்களை மட்டுமே விரும்புபவர்களுக்குப் படம் சற்று பாரமாகத் தோன்றலாம்.

ஃபைனல் கமெண்ட்:

‘வள்ளுவன்’ – இது வெறும் படம் மட்டுமல்ல, சமூகத்திற்கான பாடம்! காவல்துறையிலும், கருப்புக் கோட்டு அணிந்த வழக்கறிஞர்களிடமும் இருக்கும் சில கருப்பு ஆடுகளைத் தோலுரித்துக் காட்டும் இத்திரைப்படம், பெண் குழந்தைகளைப் பெற்ற பெற்றோர்கள் மற்றும் குடும்பங்கள் அனைவரும் தியேட்டருக்கு வந்து பார்க்க வேண்டிய ஒரு விழிப்புணர்வுப் படம்.