இளையராஜாவின் இசைப் பயணம்: அமெரிக்காவில் அதிரப்போகும் ‘ராஜ’ மேளம்!

இசை உலகின் ஒற்றைச் சூரியன், ‘இசைஞானி’ இளையராஜாவின் 50 ஆண்டுகால சாதனையைத் தமிழ் நெஞ்சங்கள் கொண்டாட இதோ ஒரு மெகா அறிவிப்பு! Saregama Live மற்றும் Mercuri நிறுவனங்கள் கைகோர்த்து, வட அமெரிக்காவில் இதுவரை இல்லாத அளவுக்குப் பிரம்மாண்டமான இசைச் சுற்றுப்பயணத்தை நடத்தவுள்ளன.

எங்கே? எப்போது?

வருகிற ஆகஸ்ட் மாதம், அமெரிக்கா மற்றும் கனடாவின் முக்கிய நகரங்களில் இசை மழையில் நனையத் தயாராகுங்கள்!

• 10-க்கும் மேற்பட்ட நகரங்கள்: நியூ ஜெர்சி, வாஷிங்டன் D.C., சிகாகோ, அட்லாண்டா, டாலஸ், ஹூஸ்டன், சீயாட்டில், சான் ஜோசே, டொரான்டோ மற்றும் மான்ட்ரியல் எனப் பட்டியல் நீள்கிறது.

• ஐகானிக் மேடைகள்: உலகப்புகழ் பெற்ற லாஸ் ஏஞ்சல்ஸ் Dolby Theatre மற்றும் பே ஏரியாவின் Oakland Arena என சர்வதேசத் தரம் வாய்ந்த அரங்குகளில் நம் ராஜாவின் இசை ஒலிக்கப்போகிறது.

“Music for Healing” – மனதை வருடும் இன்னிசை!

இந்தச் சுற்றுப்பயணத்திற்கு “Music for Healing” எனப் பெயரிடப்பட்டுள்ளது. வெறும் கச்சேரியாக மட்டுமல்லாமல், இதிலிருந்து கிடைக்கும் வருவாயின் ஒரு பகுதி, இசையின் மூலம் மனநலம் மற்றும் நல்வாழ்வை மேம்படுத்தும் சமூகப் பணிகளுக்காக வழங்கப்படவுள்ளது என்பது கூடுதல் சிறப்பு.

9000 பாடல்கள்… 1500 படங்கள்… ஒரே ஒரு ராஜா!

இந்திய இசை மரபையும், மேற்கத்திய நுணுக்கங்களையும் பின்னிப் பிணைத்து இசை உலகில் மாபெரும் சாம்ராஜ்யத்தை உருவாக்கியவர் இளையராஜா. முழுமையான ஆர்க்கெஸ்ட்ரா குழுவுடன், அந்த மேஜிக் மெலடிகளை நேரடி இசையில் கேட்கப்போகும் ரசிகர்களுக்கு இது வாழ்நாள் அனுபவமாக அமையப்போகிறது.

நிர்வாகிகளின் உற்சாகம்!

“இளையராஜாவின் இசை எல்லைகளைத் தாண்டியது; இந்த வரலாற்றுச் சிறப்புமிக்க சுற்றுப்பயணத்தை வட அமெரிக்காவிற்குத் தருவதில் பெருமிதம் கொள்கிறோம்” என்கிறார் மெர்குரி நிறுவனத்தின் MD ஸ்ரீராம் பக்திசரண்.

“இந்திய சினிமாவின் அடையாளமான ராஜாவின் இசையை உலகளாவிய ரசிகர்களுடன் இணைப்பதில் பெரும் மகிழ்ச்சி அடைகிறோம்” என சரிகமா நிறுவனத்தின் சித்தார்த் ஆனந்த் குமார் தெரிவித்துள்ளார்.