LSS: திரை விமர்சனம்: “Less Stopping Service” இருக்கிறதா?

கதை:

தலைப்பு யூ-ட்யூப் உலகத்தைச் சார்ந்ததாகத் தோன்றினாலும், கதைக்கும் அதற்கும் சம்பந்தமில்லை. படத்தின் முதற்பாதி கல்லூரிக் காதலையும், இரண்டாம் பாதி காசியில் நடக்கும் ஒரு தேடலையும் மையமாகக் கொண்டுள்ளது. படிப்பைத் தவிர வேறொன்றும் அறியாத சிவா (ஆதவ் கிருஷ்ணா) மீது பூஜா (சிம்ரன் அத்வானி) காதல் கொள்கிறார். தன் அம்மாவைச் சந்திப்பதற்காக சிவாவை அழைத்துக் கொண்டு பூஜா காசிக்குச் செல்கிறார். அங்கு எதிர்பாராத சிக்கல்கள் நேரிட, அதிலிருந்து அவர்கள் எப்படி மீள்கிறார்கள் என்பதே படத்தின் ஒன்லைன்.

ஆதவ் கிருஷ்ணா & சிம்ரன் அத்வானி: நாயகன் ஆதவ் கிருஷ்ணா கல்லூரி காட்சிகளில் ரசிக்க வைக்கிறார், ஆனால் இரண்டாம் பாதியில் வலி மற்றும் பரிதவிப்பை வெளிப்படுத்த வேண்டிய இடங்களில் இன்னும் மெனக்கெட்டிருக்கலாம். நாயகி சிம்ரன் அத்வானி, நாயகனின் நல்ல குணத்திற்காக உருகி உருகிக் காதலிக்கும் கதாபாத்திரத்தில் பொருந்துகிறார்.

 சிவாவின் தந்தையாக படவா கோபி, சீரியல் பிரியரான அம்மாவாக விநோதினி வைத்தியநாதன் ஆகியோர் அனுபவமான நடிப்பைத் தந்துள்ளனர். இவர்களை இன்னும் ஆழமாகப் பயன்படுத்தியிருக்கலாம். இவர்களது இளைய மகனாக நடித்த சிறுவன் கவர்கிறான்.

சாம்ஸ்: பெரம்பூர் ஸ்டேஷனுக்கு லிஃப்ட் கேட்டு சிக்கலில் மாட்டி கலகலப்பூட்டும் வேடத்தில் சாம்ஸ் தனது பங்களிப்பைச் சரியாகச் செய்துள்ளார்.

இசை – அஷ்வமித்ரா.  காசியின் பின்னணி மற்றும் எமோஷனல் காட்சிகளுக்குத் தேவையான பின்னணி இசை ஓரளவிற்குத் துணை நிற்கிறது. ஆனால், திரைக்கதையில் அழுத்தம் இல்லாததால் இசை பெரிய அளவில் மேஜிக் செய்யவில்லை.

ஒளிப்பதிவு (N.S. சதீஷ் குமார்): படத்தின் மிகப்பெரிய பலம் ஒளிப்பதிவுதான். கல்லூரி நூலகத்தில் பாலமாக அடுக்கப்பட்டிருக்கும் புத்தகங்கள், காசியின் படித்துறைகள், கங்கை நதி மற்றும் படகு ஓட்டங்கள் எனத் திரையை அழகாக மாற்றியுள்ளார் சதீஷ் குமார்.

படத்தொகுப்பு (ஸ்ரீகாந்த் NB): சேஸிங் காட்சிகளின் நீளத்தைக் குறைத்திருக்கலாம். திரைக்கதையில் வேகம் இல்லாதது ஒரு தொய்வை ஏற்படுத்துகிறது.

இயக்குநர் மகாலட்சுமி முருகன் ஒரு காதல் கதையைத் தேடலோடு சொல்ல முயன்றுள்ளார். இருப்பினும், அஷோக் அமிர்தராஜின் வசனங்கள் மற்றும் திரைக்கதையில் உள்ள தர்க்கப் பிழைகள் (Logic gaps) பலவீனமாக உள்ளன.

 வில்லன் கதாபாத்திரம் வலுவில்லாமல் வடிவமைக்கப்பட்டுள்ளது. மகளைக் கொல்லத் துணிபவர்கள் மீது கோபப்படாமல் இருப்பது, பணத்திற்காக எதையும் செய்பவர்களிடம் நாயகன் அழுது கெஞ்சுவது போன்ற காட்சிகள் செயற்கையாக உள்ளன.

மொத்தத்தில் படம் எப்படி உள்ளது?

LSS – தலைப்புக்கு ஏற்ப திரைக்கதையில் “Less Stopping Service” (தடையற்ற வேகம்) இருந்திருந்தால் இந்தப் பயணம் இன்னும் சுவாரஸ்யமாக இருந்திருக்கும். அழகான லொகேஷன்கள் மற்றும் அனுபவமிக்க நடிகர்கள் இருந்தும், வலுவற்ற திரைக்கதை மற்றும் லாஜிக் குறைபாடுகளால் படம் ஒரு சராசரி அனுபவத்தையே தருகிறது. காதலையும் தேடலையும் இன்னும் ஆழமாகப் பதிவு செய்திருக்கலாம்.