போலியோ முதல் ஹெச்.பி.வி. வைரஸ் வரை: பொது சுகாதாரப் பணியைத் தொடரும் ரோட்டரி கிளப் ஆஃப் மெட்ராஸ்!

போலியோ முதல் ஹெச்.பி.வி. வைரஸ் வரை: பொது சுகாதாரப் பணியைத் தொடரும் ரோட்டரி கிளப் ஆஃப் மெட்ராஸ்!

ஏறத்தாழ ஒரு நூற்றாண்டாகச் சமூக சேவையிலும் பொது சுகாதாரப் பணிகளிலும் ஈடுபட்டு வருகிறது ரோட்டரி கிளப் ஆஃப் மெட்ராஸ் (RCM). இப்போது, கர்ப்பப்பை வாய்ப் புற்றுநோயைத் தடுப்பதற்கான HPV தடுப்பூசி விழிப்புணர்வு முயற்சியில் இந்த அமைப்பு ஒரு முக்கியக் கட்டத்தை எட்டியுள்ளது.

சென்னை கலைவாணர் அரங்கத்தில் இதற்கான சிறப்பு நிகழ்ச்சி நடைபெற்றது. கிளப்பின் தலைவர் ரொட்டேரியன் எஸ். பாலகிருஷ்ணா தலைமையில் இந்த நிகழ்வு நடந்தது. இதில், தமிழ்நாடு அரசின் பொது சுகாதாரம் மற்றும் நோய்த் தடுப்பு மருந்துத் துறையிடமிருந்து ஆதரவுக் கடிதம் பெறப்பட்டது.

மாநிலம் முழுவதும் HPV தடுப்பூசி விழிப்புணர்வு, சுகாதாரக் கல்வி மற்றும் சமூகப் பங்கேற்பை மேம்படுத்த இணைந்து செயல்படுவதற்கான ஆதரவை இக்கடிதம் தெரிவிக்கிறது.

98 ஆண்டுகள் பழமையான ரோட்டரி கிளப் ஆஃப் மெட்ராஸ், 2029-ஆம் ஆண்டில் தனது நூற்றாண்டைக் கொண்டாட உள்ளது. அதற்குள் HPV தடுப்பூசி மூலம் 10 லட்சம் சிறுமிகளைப் பாதுகாக்க உதவ வேண்டும் என்பதே இந்த கிளப்பின் பிரம்மாண்ட இலக்காகும்.

1929-இல் தொடங்கப்பட்ட இந்த அமைப்பு, இந்தியாவின் நீண்டகால சேவை அமைப்புகளில் ஒன்றாகும். மருத்துவம், கல்வி, சுகாதாரம், வீட்டு வசதி மற்றும் மனிதநேய உதவிகள் எனப் பல துறைகளில் இது தொடர்ந்து பணியாற்றி வருகிறது.

உலகளாவிய ரோட்டரி இயக்கத்தின் போலியோ ஒழிப்புப் பணிகளுடன் இணைந்து, தடுப்பூசி முகாம்களுக்கும் மக்களைத் திரட்டும் பணிகளுக்கும் இந்த கிளப் பெரிதும் பங்களித்துள்ளது. கொரோனா காலத்திலும் தடுப்பூசிகளை எடுத்துச் செல்வது மற்றும் அவற்றை உரிய குளிர்நிலையில் பாதுகாப்பது போன்ற சுகாதார வசதிகளுக்கு ஆதரவு அளித்தது.

அந்தச் சேவை அனுபவத்தின் தொடர்ச்சியாக, இப்போது கர்ப்பப்பை வாய்ப் புற்றுநோயைத் தடுப்பதில் கிளப் கவனம் செலுத்துகிறது. அதிக ஆபத்துள்ள சில வகை HPV வைரஸ் தொற்றுகள் தொடர்ந்து நீடிப்பதே கர்ப்பப்பை வாய்ப் புற்றுநோய்க்கு முக்கியக் காரணமாகும். இந்த நோயைத் தடுக்க HPV தடுப்பூசி பெரிதும் உதவுகிறது.

கிளப்பின் ‘HPVAX’ திட்டம் மூலம் பொது சுகாதார அதிகாரிகள், மருத்துவ நிபுணர்கள், பள்ளிகள், பெற்றோர் மற்றும் ரோட்டரி தன்னார்வலர்கள் ஒருங்கிணைக்கப்பட உள்ளனர். தடுப்பூசி குறித்து மக்கள் சரியான தகவல்களின் அடிப்படையில் முடிவெடுக்க இது உதவும்.

நவம்பர் 18 அன்று நடைபெற்ற இந்த நிகழ்ச்சியில் சுகாதார அமைச்சரின் செயலாளர் டாக்டர் தரேஸ் அகமது, ஐஏஎஸ் பங்கேற்றார். மேலும், சுகாதாரத் துறை மூத்த அதிகாரிகள் டாக்டர் ஏ. சோமசுந்தரம், டாக்டர் பரணிதரன், டாக்டர் விஜயலட்சுமி ஆகியோரும் கலந்துகொண்டனர்.நடிகை கௌதமி தடிமல்லா சிறப்பு விருந்தினராகக் கலந்துகொண்டு சிறப்பித்தார். ரோட்டரி மாவட்ட ஆளுநராகத் தேர்ந்தெடுக்கப்பட்டுள்ள டாக்டர் விஜய பாரதி ரங்கராஜன் மற்றும் முன்னாள் மாவட்ட ஆளுநர் ஜே. பி. காம்தார் உள்ளிட்ட நிர்வாகிகளும் இதில் பங்கேற்றனர்.

HPV தடுப்பூசியை உரிய நேரத்தில் செலுத்துவதன் முக்கியத்துவத்தை பேச்சாளர்கள் வலியுறுத்தினர். மக்களிடையே விழிப்புணர்வை அதிகரிப்பது மற்றும் நோய்த் தடுப்புக்காக இணைந்து செயல்படுவது குறித்தும் அவர்கள் பேசினர். HPV தொடர்பான நோய்களிலிருந்து சிறுவர்களையும் பாதுகாக்கும் வகையில், அவர்களுக்கும் தடுப்பூசி வழங்குவது குறித்துப் பரிசீலிக்க வேண்டும் என்று நடிகை கௌதமி கருத்துத் தெரிவித்தார்.

நிகழ்ச்சியின் முக்கிய அம்சமாக பொது சுகாதாரத் துறையின் ஆதரவுக் கடிதம் வழங்கப்பட்டது. அதன் பின்னர், விருந்தினர்களும் அதிகாரிகளும் தமிழ்நாடு வரைபடத்தில் கையெழுத்திட்டனர். மாநிலம் முழுவதும் விழிப்புணர்வையும் மக்களின் பங்கேற்பையும் கொண்டு செல்லும் கூட்டு முயற்சியை இது குறித்தது.

நவம்பர் 12, 2026 தேதியிட்ட துறையின் கடிதம், விழிப்புணர்வு, தகவல், கல்வி மற்றும் தொடர்பு நடவடிக்கைகள் (IEC), சமூகப் பங்கேற்பு ஆகியவற்றில் ஒத்துழைப்பை ஆதரிக்கிறது. இதனால் அரசுக்கு எந்த நிதிப் பொறுப்பும் ஏற்படாது.

10 லட்சம் சிறுமிகள், 10 லட்சம் எதிர்காலங்கள் என்ற முழக்கத்துடன் இந்தத் திட்டம் முன்னெடுக்கப்படுகிறது. தமிழில் விழிப்புணர்வுத் தகவல்கள் வழங்குதல், பள்ளிகள் மற்றும் பெற்றோருடன் கலந்துரையாடுதல், சமூக விழிப்புணர்வு நிகழ்ச்சிகள் நடத்துதல் ஆகியவை இதில் திட்டமிடப்பட்டுள்ளன.

சேவைகள் குறைவாகச் சென்றடையும் பகுதிகளில் விழிப்புணர்வு ஏற்படுத்துவதிலும் ரோட்டரி தன்னார்வலர்கள் ஈடுபடுத்தப்பட உள்ளனர். சம்பந்தப்பட்ட அதிகாரிகளுடன் இணைந்து, மருத்துவ வழிகாட்டுதல்கள் மற்றும் தேவையான அனுமதிகளுக்கு உட்பட்டு இப்பணிகள் மேற்கொள்ளப்படும்.

10 லட்சம் சிறுமிகள் என்ற இலக்கு ரோட்டரி கிளப் ஆஃப் மெட்ராஸின் சொந்த இலக்காகும். இது தமிழ்நாடு அரசின் தடுப்பூசி வழங்கும் அல்லது நிதி ஒதுக்கும் உறுதிமொழி அல்ல. பொது சுகாதாரத் துறையின் கடிதம் மட்டும் தடுப்பூசி செலுத்துவதற்கான அனுமதியாகாது என்பதும் தெளிவுபடுத்தப்பட்டுள்ளது.

போலியோ ஒழிப்பு, கொரோனா கால சுகாதாரப் பணிகள், தற்போது HPV விழிப்புணர்வு என ரோட்டரி கிளப் ஆஃப் மெட்ராஸின் சமூகப் பணி தொடர்ந்து கொண்டிருக்கிறது. நோய்த் தடுப்பு, கல்வி மற்றும் கூட்டு முயற்சிகள் மக்களின் வாழ்வில் மாற்றத்தை ஏற்படுத்த முடியும் என்ற நம்பிக்கையுடன் கிளப் செயல்படுகிறது.

இந்த முயற்சிக்கு ஆதரவு அளித்த தமிழ்நாடு அரசு, பொது சுகாதாரத் துறை, சிறப்பு விருந்தினர்கள், மருத்துவ நிபுணர்கள் மற்றும் ரோட்டரி உறுப்பினர்களுக்கு கிளப் தனது நன்றியைத் தெரிவித்துள்ளது.