பைக்கர்: வேகம் + பாசம் கலந்த ஒரு மோட்டோகிராஸ் ரேஸ்!

இந்திய சினிமாவில் இதுவரை அதிகம் கையாளப்படாத ‘மோட்டோகிராஸ்’ (Motocross) பைக் ரேஸ் விளையாட்டை மையமாக வைத்து, தந்தை-மகன் பாசப் போராட்டத்தை உணர்வுப்பூர்வமாகச் சொல்லியிருக்கும் படம்தான் இந்த ‘பைக்கர்’.

கதைக்களம் 

விகாஸ் நாராயண் (ஷர்வானந்த்) தனது மனைவி அனன்யா (மாளவிகா நாயர்) மற்றும் மகனுடன் அமைதியான வாழ்க்கையை நடத்தி வருகிறார். ஒரு காலத்தில் சிறந்த பைக் ரேஸராக இருந்த அவர், இப்போது மோட்டோகார்ட் ஷாப் நடத்தி வருகிறார்.

அவருடைய தந்தை சுனில் நாராயண் (ராஜசேகர்) ஒரு முன்னாள் சாம்பியன். அவர் மீது சுமத்தப்பட்ட ஒரு தவறான பழிச்சொல்லால் அவர் பயிற்சியாளர் பணியை இழக்க நேரிடுகிறது. தன் தந்தையின் இழந்த கௌரவத்தை மீட்கவும், அவர் மீதான கறையைத் துடைக்கவும், பல ஆண்டுகளுக்குப் பிறகு விகாஸ் மீண்டும் பைக் ரேஸ் களத்திற்குள் நுழைகிறார். அந்தப் பயணத்தில் அவர் சந்தித்த சவால்களும், தந்தை-மகன் இடையேயான புரிதலுமே படத்தின் மீதிக்கதை.

நடிப்பு..

• ஷர்வானந்த்: ஒரு பைக் ரேஸருக்கான உடல்வாகு மற்றும் மேனரிசங்களில் மிரட்டியிருக்கிறார். இரண்டு விதமான தோற்றங்களுக்காக அவர் காட்டியிருக்கும் உடலுழைப்பு திரையில் அப்பட்டமாகத் தெரிகிறது. எமோஷனல் காட்சிகளிலும், ரேஸ் டிராக்கிலும் ஒரு முழுமையான ஆட்ட நாயகனாக ஜொலிக்கிறார்.

• டாக்டர் ராஜசேகர்: நீண்ட இடைவேளைக்குப் பிறகு ஒரு பவர்ஃபுல் ரோலில் வந்திருக்கிறார். மகனைச் சாதனையாளனாகப் பார்க்கத் துடிக்கும் தந்தை, அதே சமயம் தன் மாஸை விட்டுக்கொடுக்காத கம்பீரம் எனப் படத்தில் ஒரு தூணாக நிற்கிறார்.

• மாளவிகா நாயர்: காதலியாகவும், பொறுப்பான மனைவியாகவும் யதார்த்தமான நடிப்பை வழங்கியிருக்கிறார். குறிப்பாக, கணவனின் உயிருக்கு ஆபத்தான விளையாட்டை நினைத்துப் பதறும் காட்சிகளில் ஸ்கோர் செய்கிறார்.

• அதுல் குல்கர்னி: கார்ப்பரேட் வில்லத்தனத்தில் தனது அனுபவ முத்திரையைப் பதித்திருக்கிறார்.

ஹைலைட்ஸ்:

• மோட்டோகிராஸ் ரேஸிங்: பைக் சாகசக் காட்சிகள் மற்றும் ‘மவுண்டன் ஜம்ப்’ (Mountain Jump) காட்சிகள் பார்ப்பவர்களை இருக்கை நுனியில் அமர வைக்கின்றன.

• வசனங்கள்: ‘பயங்கிறதுதான் தோல்விக்குக் காரணம்; அதே பயம்தான் வெற்றிக்கு ஆயுதம்’ போன்ற வசனங்கள் தியேட்டரில் கைதட்டல் பெறுகின்றன.

• க்ளைமாக்ஸ்: படத்தின் இறுதி 20 நிமிட பைக் பந்தயக் காட்சிகள் தொழில்நுட்ப ரீதியாக ஒரு உலகத்தரம் வாய்ந்த அனுபவத்தைத் தருகின்றன.

தொழில்நுட்பக் கலைஞர்கள் 

• இசையமைப்பாளர் ஜிப்ரான்: படத்தின் மிகப்பெரிய பலம் இவரது பின்னணி இசைதான். ரேஸ் டிராக்கில் பைக் பறக்கும்போது இவரது இசையும் நம் ரத்த அழுத்தத்தை ஏற்றுகிறது.

• ஒளிப்பதிவாளர் ஜே. யுவராஜ்: பைக் ரேஸ் காட்சிகளைப் படமாக்கிய விதம் அற்புதம். கேமரா கோணங்கள் ஒவ்வொன்றும் காட்சிகளுக்கு உயிர் கொடுத்துள்ளன.

• படத்தொகுப்பு: அனில் குமார் பலாசாவின் எடிட்டிங், குறிப்பாக ரேஸ் காட்சிகளைத் தொகுத்த விதம் படத்தை ஒரு ‘ஸ்பீடு ரைடு’ ஆக மாற்றியுள்ளது.

• இயக்குநர் அபிலாஷ் ரெட்டி: வழக்கமான ஸ்போர்ட்ஸ் டிராமா கதையாக இருந்தாலும், அதை ‘மோட்டோகிராஸ்’ பின்னணியில் நேர்த்தியான திரைக்கதையால் விறுவிறுப்பாகக் கையாண்டுள்ளார்.

மொத்தத்தில்..

படம் ஆரம்பத்தில் சற்று மெதுவாக நகர்ந்தாலும், இரண்டாம் பாதியில் எடுக்கும் வேகம் க்ளைமாக்ஸ் வரை குறையவில்லை. தந்தை-மகன் சென்டிமென்ட் மற்றும் விறுவிறுப்பான பைக் ரேஸ் என இரண்டு சக்கரங்களையும் சரியாகச் சுழல வைத்திருக்கிறார் இயக்குநர்.

ஃபைனல் பஞ்ச்: வேகமான பந்தயம்… பாசமான இதயம்… மொத்தத்தில் ‘பைக்கர்’ ஒரு நிஜமான சாம்பியன்!