பாலன்: தி பாய் – மர்மமும் பாசமும் பின்னிய ஒரு தாயின் போராட்டம்!

மலையாள சினிமாக்களுக்கே உரிய தனித்துவமான கதை சொல்லும் முறை, ஒரு சிறிய புள்ளியில் தொடங்கி மிகப்பெரிய தாக்கத்தை ஏற்படுத்தும் திரைக்கதை என ‘பாலன்: தி பாய்’ திரைப்படம் ரசிகர்களைக் கவர்கிறது.

கதை

 சிறையிலிருந்து விடுதலையாகும் பர்சானா, தன் மகனுடன் தனது கடந்த கால அடையாளங்களை முழுவதுமாக அழித்துவிட்டு, ஒவ்வொரு ஊராக இடம் பெயர்ந்து வாழ்கிறாள். தன் மகனைப் பாதுகாப்பாக வளர்க்க வேண்டும் என்பது மட்டுமே அவளது லட்சியம். செல்லும் இடமெல்லாம் அவளைத் துரத்தும் ஒரு மர்மமான ஆபத்து, ஒரு கட்டத்தில் ஒரு முதிய பெண்மணியின் வீட்டில் வேலைக்குச் சேர அவளைத் தள்ளுகிறது. அங்கே தொடங்கும் எதிர்பாராத திருப்பங்களும், சிக்கல்களுமே கதையின் மையம். அந்தத் தாய்-மகன் உறவின் முடிவென்ன என்பதே மீதிக்கதை.

நடிப்பு

அம்மாவாக நடித்திருக்கும் பர்சானா, மிகச் சிறந்த நடிப்பை வெளிப்படுத்தியிருக்கிறார். தனித்துவிடப்பட்ட ஒரு தாயின் மன உளைச்சலையும், தன் மகனைக் காப்பதற்கான போராட்டங்களையும் அவர் மிக அருமையாகக் கடத்தியிருக்கிறார். புதுப் புது அடையாளங்களை உருவாக்கும்போது, ஒரு தாய் பறவையின் பயமும் உறுதியும் அவர் கண்களில் தெரிகிறது.

மகனாக வரும் குழந்தை நட்சத்திரம் அதிசேஷன் மிக இயல்பாக நடித்திருக்கிறார். குழந்தைகளுக்கே உரிய குறும்பை வெளிப்படுத்துவது ஆகட்டும், மர்மமான சூழலை உணர்ந்து திறமையாகச் சமாளிப்பது ஆகட்டும்… அனைத்திலும் அவர் அற்புதம். வளர்ந்த மகனாக வரும் சினானும் தாயைத் தேடி மேற்கொள்ளும் பயணம் மனதைக் கனக்க வைக்கிறது. முரட்டுப் போலீஸ் அதிகாரியாக வரும் ஜீன் பால் லால், தன் மிரட்டலான நடிப்பால் ஈர்க்கிறார்.

ஒளிப்பதிவு:

ஷைஜு காலித்தின் கேமரா, கதாபாத்திரங்களின் அந்தரங்க உணர்வுகளை மிக அழகாகப் பதிவு செய்திருக்கிறது. அதோடு, காட்டுப் பகுதி மற்றும் அவர்கள் வசிக்கும் வீடுகளைக் கண் முன் நிஜமாகவே கொண்டுவந்து நிறுத்துகிறது.

இசை: சுஷின் ஷ்யாமின் பின்னணி இசை, காட்சிகளை மிகைப்படுத்தாமல், அந்தந்த உணர்வுகளுக்கு உயிர் கொடுக்கிறது.

இயக்கம்

இயக்குநர் சிதம்பரம், ‘மஞ்சும்மேல் பாய்ஸ்’ படத்திற்குப் பிறகு மீண்டும் ஒரு எளிமையான கதையை மர்மம் நிறைந்த திரில்லராகக் கட்டமைத்துள்ளார். படத்தின் முதல் பாதி மர்மமும் பதட்டமும் நிறைந்த த்ரில்லர் அனுபவத்தைத் தருகிறது. இரண்டாம் பாதி தாயின் உணர்ச்சிகளுக்கும், அந்தச் சிறுவனின் மன மாற்றத்திற்கும் அதிக முக்கியத்துவம் அளிக்கிறது.

நிறைகள் மற்றும் குறைகள்

• நிறைகள்: குழந்தை நட்சத்திரத்தின் நடிப்பு, விறுவிறுப்பான முதல் பாதி மற்றும் கிளைமாக்ஸ் காட்சிகள். எமோஷனல் காட்சிகளை எவ்வித மிகையுமின்றி அமைதியாகக் கையாண்ட விதம் பாராட்டுக்குரியது.

• குறைகள்: இரண்டாம் பாதியில் கதை சற்று மந்தமாக நகர்வது சிலருக்குச் சலிப்பை ஏற்படுத்தலாம். சில துணை கதாபாத்திரங்கள் இன்னும் அழுத்தமாக உருவாக்கப்பட்டிருக்கலாம்.

ஃபைனல் கமெண்ட்: 

‘பாலன்’ வெறும் த்ரில்லர் திரைப்படம் மட்டுமல்ல; இது உயிர் பிழைப்பதற்கான போராட்டம் மற்றும் ஒரு தாயின் தீவிரமான அர்ப்பணிப்பைப் பேசும் கதை. பல இடங்களில் பொறுமையைச் சோதித்தாலும், அதன் நிதானமான கதை சொல்லலும், கிளைமாக்ஸில் வெளிப்படும் உண்மைகளும் படம் முடிந்த பிறகும் மனதை விட்டு நீங்காத அழுத்தத்தைக் கொடுக்கின்றன.

நிச்சயமாக ஒருமுறை பார்க்க வேண்டிய, நம்மை ஆழமாகச் சிந்திக்க வைக்கும் படைப்பு!