ஏழு கடல் ஏழு மலை: விமர்சனம்: அகத்தினுள் ஒரு சாகசப் பயணம்!!

இயக்குநர் ராம் இயக்கத்தில், நிவின் பாலி, சூரி, அஞ்சலி நடிப்பில் உருவான ‘ஏழு கடல் ஏழு மலை’ திரைப்படம் திரையுலகில் ஒரு புதிய அனுபவத்தைத் தந்துள்ளது. கலைப் படங்களின் நேர்த்தியையும் வணிகத் திரைப்படத்தின் சுவாரஸ்யத்தையும் மிகச் சரியாகக் கலந்தளித்திருக்கும் இப்படத்தின் அலசல் இதோ:

கதைக்களம்:

தீபாவளி இரவில் அமைதியான ஒரு ரயில் பெட்டி. எட்டாயிரம் ஆண்டுகளாகத் தன் காதலின் உன்னதத்தைத் தேடி அலையும் நிவின் பாலியும், துபாயில் உழைத்துவிட்டுத் தன் குடும்பத்தைக் காணத் திரும்பும் சூரியும் தற்செயலாகச் சந்திக்கிறார்கள். நிவினின் விசித்திரமான தோற்றத்தைக் கண்டு சூரி தொடக்கத்தில் தயங்கினாலும், அவர்களின் உரையாடல் வழியாக விரியும் நிவினின் காதலும், அஞ்சலியின் பாத்திரமும் நம்மை ஒரு கற்பனை உலகத்திற்கே அழைத்துச் செல்கின்றன.

நடிப்பு:

• நிவின் பாலி: நீண்ட தலைமுடியும் தாடியும் கொண்ட மர்மமான தோற்றத்தில் மிரட்டியிருக்கிறார். காதல், ஆக்ரோஷம், கோபம், தவிப்பு என ஒவ்வொரு கணத்திலும் தன் நடிப்பால் கதாபாத்திரத்திற்கு உயிர் கொடுத்திருக்கிறார். நிவினின் குரலுக்குப் பின்னால் இயக்குநர் ராமின் குரல் ஒப்பது, கதையின் ஆன்மாவுடன் இயக்குநர் எவ்வளவுக்கு எவ்வளவு ஒன்றிணைந்துள்ளார் என்பதைக் காட்டுகிறது.

• சூரி: வழக்கமான நகைச்சுவையைத் தாண்டி, அப்பாவித்தனமான நடிப்பால் பார்வையாளர்களின் முகத்தில் புன்னகையை வரவழைக்கிறார். சூரியின் எதார்த்தமான உடல்மொழி படத்திற்குப் பெரிய பலம்.

• அஞ்சலி: காதலின் தீவிரத்தை முகத்திலும் கண்களிலும் ததும்பச் செய்யும் பாத்திரத்திற்கு மிகவும் பொருத்தமான தேர்வு.

ஒளிப்பதிவு மற்றும் தொழில்நுட்ப இயக்கம்:

• ஒளிப்பதிவு (என்.கே.ஏகாம்பரம்): ஒற்றை ரயில் பெட்டிக்குள் கதையை நகர்த்தினாலும், காடு, மலை, கடற்கரை எனப் பல்வேறு நிலவியல்களைத் தன் கேமரா கண்களால் மிக அழகியலாகப் பதிவு செய்துள்ளார் ஒளிப்பதிவாளர். ஒவ்வொரு ஃபிரேமும் ஒரு ஓவியம் போலக் கண்முன்னே விரிகிறது.

• படத்தொகுப்பு: மதி வி.எஸ்ஸின் படத்தொகுப்பு காட்சிகளைத் துரிதமாகவும் விறுவிறுப்பாகவும் நகர்த்திச் செல்ல உதவுகிறது.

இசையும் பாடல்களும்:

யுவன் ஷங்கர் ராஜா – சந்தோஷ் தயாநிதி கூட்டணி தமிழ் சினிமாவுக்கு மற்றுமொரு பொக்கிசத்தைத் தந்துள்ளது. காதலை ஒளிரவிடும் பாடல்களும், படத்தின் ஒவ்வொரு உணர்வுபூர்வமான தருணத்தையும் தூக்கிப் பிடிக்கும் பின்னணி இசையும் படத்தின் மிகப்பெரிய பலம். பின்னணி இசை மூலம் மட்டுமே பல உணர்வுகளை ரசிகர்களின் இதயத்திற்குள் ஆழமாகப் பாய்ச்சியிருக்கிறார்கள்.இயக்குநர் ராமின் முத்திரையும் இயக்கமும்:

இயக்குநர் ராம் தனது தனித்துவமான முத்திரையை இப்படத்திலும் அழுத்தமாகப் பதித்துள்ளார். மனித வாழ்வு, ஜீவகாருண்யம், ஆதி மனிதனின் இயல்பு, காதலின் பரிமாணங்கள் போன்ற தத்துவார்த்த சிந்தனைகளைத் திரையில் கொண்டுவந்த விதம் பாராட்டுக்குரியது. பார்வையாளர்களைச் சிந்தி தூண்டும் காட்சிகளும், காதலின் ஆழத்தைப் பேசும் உரையாடல்களும் படத்தின் தரத்தை உயர்த்துகின்றன. இரண்டாம் பாதியில் விரியும் மூன்று காலகட்ட காதல் கதைகள் பார்வையாளர்களுக்குக் காதலின் கதகதப்பை முழுமையாகக் கடத்துகின்றன.

மொத்தத்தில் படம் எப்படி?

காதலின் எல்லையற்ற ஆழத்தையும், ஆன்மாவின் தேடலையும் பேசும் ஒரு அற்புதமான கலைப்படைப்பு இது. வழக்கமான ஃபார்முலா படங்களிலிருந்து விலகி, வித்தியாசமானதொரு திரையனுபவத்தைத் தேடும் ரசிகர்களுக்கு ‘ஏழு கடல் ஏழு மலை’ ஒரு சிறந்த விருந்து!