“விஜய் படங்களைப் போல ‘மகுடம்’ படத்தையும்…!”: – விஷால் அதிரடி பேச்சு

அக்மார்க் ஆக்ஷன் ஹீரோவாக வலம் வந்த விஷால், இப்போது ‘டைரக்டர் விஷால்’ அவதாரம் எடுத்து கெத்து காட்டியிருக்கிறார். சூப்பர் குட் ஃபிலிம்ஸ் தயாரிப்பில் உருவாகியுள்ள ‘மகுடம்’ திரைப்படத்தின் டிரெய்லர் வெளியீட்டு விழா, மொத்த கோலிவுட்டையும் திரும்பிப் பார்க்க வைத்திருக்கிறது.

கஷ்டங்களைக் கடந்த நம்பிக்கை பயணம்! விழாவில் கலந்துகொண்டு திறந்த மனதுடன் பேசிய விஷால், கடந்த ஓராண்டு காலம் தனிப்பட்ட வாழ்க்கையிலும், பட வாய்ப்புகள் இல்லாமலும் சந்தித்த சவால்களைப் பகிர்ந்துகொண்டார். “14 மாதங்கள் நடிக்க முடியாமல் வீட்டில் முடங்கிக் கிடந்தேன். அந்த இக்கட்டான சூழலில் என் மீது அளப்பரிய நம்பிக்கை வைத்த வருங்கால மனைவி சாய் தன்ஷிகா, தயாரிப்பாளர் ஆர்.பி.சவுத்ரி மற்றும் திருப்பூர் சுப்பிரமணியன் ஆகியோருக்கு என் மனமார்ந்த நன்றிகள்” என உணர்ச்சிவசப்பட்டார்.

இயக்குநர் கனவும் குருநாதர்களும்! “இயக்குநராக வேண்டும் என்பது என்னுடைய 35 வருட கனவு” என்று குறிப்பிட்ட விஷால், ராம்கோபால் வர்மாவின் ‘உதயம்’ படத்தைப் பார்த்துத்தான் இந்த ஆசை பிறந்ததாகக் கூறினார். அர்ஜுனிடம் உதவி இயக்குநராகச் சேர்ந்து, பாலா, சுந்தர் சி எனத் தமிழ் சினிமாவின் முன்னணி இயக்குநர்களிடம் கற்ற வித்தைகளையெல்லாம் இந்த படத்தில் இறக்கியுள்ளாராம்.

மேஜிக் செய்யக் காத்திருக்கும் கடைசி 8 நிமிடங்கள்! படப்பிடிப்பு தளத்தில் ஆக்ஷன் சொல்லிவிட்டு சில நொடிகள் கழித்தே நடிகர்களை நடிக்க வைத்தாராம். எடிட்டிங் வசதிக்காகத் தான் செய்த இந்த வேலைகளுக்கு, தொழில்நுட்பக் கலைஞர்களும் நடிகர்களும் எந்த ஈகோவும் இல்லாமல் முழு ஒத்துழைப்பு கொடுத்ததாகப் பாராட்டினார். “படத்தின் கடைசி எட்டு நிமிடங்கள் இதுவரை யாரும் பார்த்திராத மேஜிக்காக இருக்கும்! ஜி.வி.பிரகாஷின் பின்னணி இசை படத்திற்கு உயிர் கொடுத்துள்ளது. இளையராஜா சாரின் இசையையும் இதில் பயன்படுத்தியிருக்கிறோம்” என மாஸ் அப்டேட் கொடுத்தார்.

ரோஹிணி தியேட்டர் கொண்டாட்டம்! “எனக்குப் பிடித்த நடிகர், இன்று முதல்வராக இருக்கும் விஜய்யின் படங்களை ரோஹிணி தியேட்டரில் உட்கார்ந்து ரசிகனாக எப்படி ரசித்துப் பார்த்தேனோ, அதேபோல ‘மகுடம்’ படத்தையும் ஆகஸ்ட் 14-ஆம் தேதி அதே தியேட்டரில் பார்த்து ரசிக்கப்போகிறேன்” என்று மாஸாக அறிவித்தார் விஷால்.

துஷாரா விஜயன், அஞ்சலி, ஜான் விஜய் எனப் பெரிய பட்டாளமே நடித்துள்ள ‘மகுடம்’, அனைத்து தடைகளையும் தாண்டி திரைக்கு வரத் தயாராக உள்ளது. ஆகஸ்ட் 16 அன்று நடக்கும் வெற்றி விழாவில் இன்னும் பல சுவாரசியங்களை உடைப்பதாகக் கூறி விடைபெற்றார் விஷால்!