டார்க் ஜெயன்ட்: விமர்சனம்

வாழ்க்கையில் கடும் கடன் சுமையில் தவிக்கும் ஆதர்ஷ் மதிகாந்த், தனது பூர்வீக சொத்து கிடைக்கப்போகும் நம்பிக்கையில் மனைவி மற்றும் தங்கையுடன் தாத்தாவின் கிராமத்துப் வீட்டிற்குச் செல்கிறார். ஆனால், அங்கே அவர் சந்திக்கும் அமானுஷ்ய சம்பவங்களும், அந்த தாத்தா குறித்த அதிர்ச்சிகரமான உண்மைகளும், ஒரு கட்டத்தில் சாத்தானின் பிடியில் நாயகன் சிக்குவதும் தான் படத்தின் மீதிக்கதை.

வழக்கம்போல திகில் கதையைத் தேர்ந்தெடுத்திருக்கும் ஆதர்ஷ் மதிகாந்த், அப்பாவித்தனமான கதாபாத்திரம் முதல், சாத்தானின் பிடியில் ஆக்ரோஷமாக மாறும் வரை தனது நடிப்பை நேர்த்தியாக வெளிப்படுத்தியுள்ளார். நாயகியின் பாத்திரத்தில் வரும் ஜோவிதா லிவிங்ஸ்டன் மற்றும் பவித்ரா அன்பழகன் ஆகியோர், குடும்ப சூழலுக்குப் பொருத்தமான நடிப்பை வழங்கியுள்ளனர். கதையின் போக்கில் அவ்வப்போது தோன்றும் சோனியா அகர்வால் மற்றும் அருவி மதன் தங்களுக்கு அளிக்கப்பட்ட கதாபாத்திரங்களைச் சிறப்பாக செய்துள்ளனர். மேலும், கே.பாக்யராஜ், லிவிங்ஸ்டன், அமுதவாணன் போன்ற நட்சத்திரங்களின் வருகை படத்திற்கு வலு சேர்த்துள்ளது.

படம் பார்ப்பவர்களை அச்சத்தில் உறைய வைப்பதில் ஒளிப்பதிவாளர் சங்கீத் மணிகோபால் மற்றும் இசையமைப்பாளர் விக்னேஷ் ராஜாவின் பங்களிப்பு அளப்பரியது. திகில் காட்சிகளைப் படமாக்கிய விதம் மற்றும் பதட்டத்தை உண்டாக்கும் பின்னணி இசை படத்தின் தரத்தை உயர்த்தியுள்ளன. கலை இயக்கம் மற்றும் வி.எஃப்.எக்ஸ் பணிகளும் படத்திற்குப் பக்கபலமாக அமைந்துள்ளன.

இயக்குநர் கே.எஸ்.கிஷான், ஒரு பழைய வீட்டில் நடக்கும் திகில் கதையை மையமாக வைத்து, பார்வையாளர்களை இருக்கையின் நுனிக்கே வரவழைக்கும் வகையில் காட்சிகளை அமைத்துள்ளார். எனினும், திரைக்கதையில் சில இடங்களில் தடுமாற்றங்கள் காணப்படுகின்றன. முக்கியமாக, சாத்தானின் ஆதிக்கத்தை மட்டுமே முன்னிறுத்தி, முடிவைத் தெளிவற்றதாக வைத்திருப்பது படத்தின் பெரிய பலவீனமாகத் தெரிகிறது. ஒருவேளை படத்தின் அடுத்த பாகத்திற்காக கதையை முழுமையாக முடிக்காமல் விட்டிருக்கலாம் என்று தோன்றுகிறது.

பெயருக்கேற்ற பிரம்மாண்டம் இல்லையென்றாலும், தற்காலப் படங்களுக்கே உரிய பாணியில் சாத்தானின் சக்தியை மையப்படுத்தி எடுக்கப்பட்ட ஒரு திகில் அனுபவம் இது. திரைக்கதையில் சில குறைபாடுகள் இருந்தாலும், திகில் பட ரசிகர்களை ஓரளவிற்குத் திருப்திப்படுத்தும் வகையில் இந்தத் திரைப்படம் அமைந்துள்ளது.