“என் வாழ்விற்குக் காரணம் அவர்தான்!” – ஜி.வி.பிரகாஷ் பிறந்தநாளில் உருகிய வேல்முருகனின் பாசப் பரிசு!

இசையமைப்பில் சதம் அடித்து, தமிழ் சினிமாவின் அசுர வேக நாயகனாக வலம் வரும் ஜி.வி.பிரகாஷ்குமாருக்கு இன்று பிறந்தநாள் கொண்டாட்டம்! இந்த இரட்டைச் சந்தோஷத்தை இன்னும் அழகாக்கும் விதமாக, பின்னணிப் பாடகர் வேல்முருகன் ஒரு செம சர்ப்ரைஸ் கொடுத்திருக்கிறார்.

ஜி.வி. பிரகாஷின் 100 பட மைல்கல்லைக் கொண்டாடும் வகையில், ‘100 Films GV Sir’ என்று பிரத்யேகமாக முத்திரை பொறிக்கப்பட்ட பளபளக்கும் தங்கச் சங்கிலியை, ஜி.வி.யின் கழுத்தில் அணிவித்துத் தன் அன்பைப் பொழிந்திருக்கிறார் வேல்முருகன். இந்த நெகிழ்ச்சியான தருணத்தின்போது, வேல்முருகனின் மகளும், இசையமைப்பாளர் என்.ஆர்.ரகுநந்தனும் உடனிருந்து வாழ்த்துகளைப் பகிர்ந்து கொண்டனர்.

வெளிச்சம் தந்த ‘ஒத்த சொல்லால’!

நாட்டுப்புறப் பாடல்களின் கம்பீரக் குரலாக ஒலிக்கும் வேல்முருகன், ஆரம்பத்தில் சில பாடல்கள் பாடியிருந்தாலும், ஜி.வி.பிரகாஷ் இசையமைப்பில் வெளிவந்த ‘ஆடுகளம்’ திரைப்படத்தின் ‘ஒத்த சொல்லால’ பாடல் தான் அவருக்குப் பிரம்மாண்ட அங்கீகாரத்தைத் தந்தது.

அன்று ஜி.வி. போட்டுக் கொடுத்த ராயல் பாதை தான், இன்று உலக நாடுகளுக்குப் பயணம் செய்யும் உயரத்திற்கும், 19 ஆண்டுகாலத் தொடர் இசைப் பயணத்திற்கும் அடித்தளம் என்கிறார் வேல்முருகன்.

ஹிட் லிஸ்ட் கூட்டணி!

இவர்கள் கூட்டணியில் வெளியான அத்தனை பாடல்களுமே பட்டிதொட்டியெங்கும் பக்கா மாஸ் ஹிட்டடித்தவை.

• ஆடுகளம் – ஒத்த சொல்லால

• சகுனி – போட்டது பத்தல

• கொம்பன் – கருப்பு நிறத்தழகி

• அசுரன் – கத்தரிப் பூவழகி

நன்றியோடு நெகிழ்ந்த வேல்முருகன்!

“ஆடுகளம் தொடங்கி, சகுனி, கொம்பன், செம, அசுரன், யானை, வீர தீர சூரன், தாண்டவம், மீண்டும் ஒரு காதல் கதை, ரெபல், எனத் தொடர்ந்து அண்மையில் செம ஹிட்டான ‘பராசக்தி’ வரை 25 படங்களில் எனக்குத் தொடர்ந்து வாய்ப்பளித்து, என் வாழ்வில் ஒளியேற்றியவர் என் அன்பிற்குரிய ஜி.வி. சார். இன்று நானும் என் குடும்பமும் நிம்மதியாகவும் மகிழ்ச்சியாகவும் வாழ்கிறோம் என்றால், அதற்கு அவர் தந்தப் பாடல் வாய்ப்புகள்தான் காரணம். அவருக்கு எப்படி நன்றி சொல்வதென்றே தெரியவில்லை. இந்த அன்பின் வெளிப்பாடுதான் என் பிறந்தநாள் பரிசு!”

என்று உருகியுள்ளார் பாடகர் வேல்முருகன். திறமையைக் கொண்டாடும் இந்த இசைக் கூட்டணி, மேலும் பல சாதனைகளைப் படைக்க வாழ்த்துகள்!