“என்னை நம்புங்கள்!” : ‘லீடர்’ விழாவில் லெஜெண்ட் சரவணன்! 

லெஜெண்ட் சரவணன் நாயகனாக நடித்துள்ள ‘லீடர்’ திரைப்படத்தின் இசை மற்றும் ஆக்ஷன் டீசர் வெளியீட்டு விழா சென்னையில் கோலாகலமாக நடைபெற்றது. ஆர்.எஸ். துரை செந்தில்குமார் இயக்கத்தில், ஜிப்ரான் இசையில் உருவாகியுள்ள இப்படம் ஏப்ரல் 3-ம் தேதி திரைக்கு வருகிறது. விழாவில் திரையுலகப் பிரபலங்கள் பகிர்ந்த சுவாரஸ்யமான தகவல்கள்:

பாடலாசிரியர்களின் வாழ்த்து

பாடலாசிரியர் விவேகா: “விழாவின் தொடக்கத்தில் ஒலித்த ‘முத்தைத்தரு’ திருப்புகழ் பாடல் மெய்சிலிர்க்க வைத்தது. லெஜெண்ட் சரவணன் எதைச் சொன்னாலும் அது வைரலாகிறது. ‘எல்லோருக்கும் முன்னால் கடைக்குச் செல்ல வேண்டும், எல்லோருக்கும் பின்னால் வர வேண்டும்’ என்கிற அவரது தந்தையின் அறிவுரைதான் அவரது வெற்றியின் ரகசியம். இது வணிக உலகின் பைபிள் போன்றது.”

பாடலாசிரியர் மோகன் ராஜன்: “அப்பா – மகள் பாசத்தை உணர்த்தும் ஒரு பாடலை இதில் எழுதியுள்ளேன். நான்கு பேர் நன்றாக இருக்க வேண்டும் என்று நினைக்கும் ஒவ்வொருவரும் லீடர் தான். அந்த வகையில் லெஜெண்ட் சரவணன் நிஜ வாழ்க்கையிலேயே ஒரு லீடர் தான். வாலி ஐயா பாணியில் சொல்ல வேண்டுமென்றால், ‘உங்களுக்கு நீங்களே தான் பார்டர்… நீங்கள் தான் உண்மையான லீடர்’.”

தயாரிப்பாளர்களின் பாராட்டு

தயாரிப்பாளர் கலைப்புலி எஸ். தாணு: “சரவணன் பல கதைகளை மனதில் வைத்திருக்கிறார். ஒருமுறை என்னிடம் புரூஸ்லீ கதை ஒன்றைச் சொன்னார். அதற்காகத் தன்னைத் தயார்படுத்திக் கொள்ளவும் அவர் தயாராக இருந்தார். அவரது உழைப்பும் எண்ணமும் பெரிய வெற்றியைப் பெறும்.”

தயாரிப்பாளர் தியாகராஜன்: “லெஜெண்ட் சரவணனின் முதல் படத்தின் பிரம்மாண்டத்தைப் பார்த்த போதே அடுத்த படம் என்னவாக இருக்கும் என்று யோசித்தேன். துரை செந்தில்குமார் இயக்கத்தில் அவர் நடிப்பது மகிழ்ச்சி அளிக்கிறது. வெற்றி விழாவில் மீண்டும் சந்திப்போம்.”

இயக்குநர்களின் வாழ்த்துரை

இயக்குநர் ஆர்.கே. செல்வமணி: “1988-ல் இருந்தே சரவணன் குடும்பத்தை எனக்குத் தெரியும். வாடிக்கையாளரை மதிப்பதுதான் அவர்களின் வெற்றிக்குக் காரணம். நேர்மை, குறைந்த லாபம், நிறைய வாடிக்கையாளர்கள் இதுவே அவர்களின் தாரக மந்திரம். சினிமா தொழிலாளர்களை வாழ வைக்க லெஜெண்ட் சரவணன் இதுபோல இன்னும் பல நூறு படங்களைத் தயாரிக்க வேண்டும்.”

இயக்குநர் பாக்யராஜ்: “யாரைப் பற்றியும் கவலைப்படாமல், நினைத்ததைத் தைரியமாகச் செய்து முடிப்பவர் சரவணன். இந்த தன்னம்பிக்கை எனக்குப் பிடிக்கும். ‘லெஜெண்ட்’ படத்திற்குப் பிறகு ‘லீடர்’ என்ற தலைப்பு அவருக்கு மிகப்பொருத்தமாக இருக்கிறது. ஜிப்ரான் இசையும் துரை செந்தில்குமாரின் உழைப்பும் சேர்ந்து இப்படத்தைப் பெரிய வெற்றிப் படமாக்கும்.”

திரை பிரபலங்களின் அனுபவங்கள்

தயாரிப்பாளர் தனஞ்செயன்: “வணிக உலகில் சாதனை படைத்த நீங்கள், சினிமாவிலும் ஒரு முக்கிய இடத்தைப் பிடித்துள்ளீர்கள். ‘தெறி’, ‘விஸ்வாசம்’ போல அப்பா – மகள் உணர்வுகளைப் பேசும் படங்கள் எப்போதும் வெற்றி பெறும். அந்த வரிசையில் ‘லீடர்’ படமும் ஒரு மைல்கல்லாக அமையும்.”

நடிகை அறந்தாங்கி நிஷா: “தன்னுடன் இருப்பவர்களையும் பெருமைப்படுத்துபவரே உண்மையான லீடர். சரவணன் ஐயா எங்களை எப்போதும் ஊக்கப்படுத்திக் கொண்டே இருப்பார். படப்பிடிப்பு நடந்த ஊர் முழுவதற்கும் அவர் விருந்து படைத்தார். இப்படத்தில் அவரைத் திட்டும் காட்சியில் நடித்திருக்கிறேன், அதனால் படம் ரிலீஸான பிறகு சில காலம் அவர் கடைக்குப் போக முடியாது (சிரிக்கிறார்).”

பேபி இயல்: “இப்படத்தில் சென்டிமென்ட், கோபம் எனப் பல உணர்வுகளை வெளிப்படுத்தியுள்ளேன். ரயில் சண்டைக்காட்சியின் போது அங்கிள் கால் இடறி விழுந்த போது எனக்கு ‘மினி ஹார்ட் அட்டாக்’ வந்ததே தவிர, அவர் அசராமல் எங்களைக் காப்பாற்றி நடித்தார். அவ்வளவு ரிஸ்க் எடுக்காதீர்கள் என்று அவரிடம் கேட்டுக் கொண்டேன்.”

நடிகர் ஷாம்: “துரை செந்தில்குமார் ஒரு பொறுப்புணர்வு மிக்க இயக்குநர். சரவணன் சாரிடம் ஒரு சிறந்த நகைச்சுவை உணர்வு இருக்கிறது. வாழ்க்கையைப் பற்றிய பெரிய கண்ணோட்டம் அவரிடம் உள்ளது. சினிமாவுக்குத் தேவையான தொலைநோக்கு பார்வை கொண்ட மனிதர் அவர்.”

நடிகர் வி.டி.வி கணேஷ்: “பணம் யாரிடம் வேண்டுமானாலும் இருக்கலாம், ஆனால் நடிப்பதற்கான வெறி சிலருக்கே வரும். அது சரவணன் சாரிடம் இருக்கிறது. இப்படம் வசூலில் புதிய சாதனை படைக்கும்.”

தொழில்நுட்பக் கலைஞர்களின் உரை

இசையமைப்பாளர் ஜிப்ரான்: “இந்தப் படத்தில் பணியாற்றியது ஒரு சிறந்த அனுபவம். துரை செந்தில்குமார் அமைதியானவர், ஆனால் வேலையில் தீவிரமானவர். ஒரு சிறிய பின்னணி இசை மாற்றம் கூட எவ்வளவு பெரிய மாற்றத்தைத் தரும் என்பதை அவரிடம் கற்றுக் கொண்டேன். சரவணன் சார் ஒரு அர்ப்பணிப்புள்ள நடிகராகத் தன்னை நிரூபித்துள்ளார்.”

இயக்குநர் துரை செந்தில்குமார்: “எனது ஆறாவது படம் இது. பல கதைகள் கைகூடாத நேரத்தில் லெஜெண்ட் சார் எனக்கு நம்பிக்கை அளித்தார். ‘கருடன்’ முடித்து வரும் வரை எனக்காகக் காத்திருந்தார். அவரது ஆற்றல் துப்பாக்கியிலிருந்து பாயும் குண்டு போன்றது. நமக்காக நூறு பேர் காத்திருக்கிறார்கள், நாம் தாமதிக்கக் கூடாது என்று அவர் சொல்வது எனக்குப் பெரிய பாடம். ஜிப்ரானின் இசை படத்திற்குப் பெரிய பலம்.”

நாயகன் லெஜெண்ட் சரவணன் பேச்சு

“உலகில் அமைதி நிலவ இறைவனைப் பிரார்த்திக்கிறேன். ‘லீடர்’ ஒரு அப்பாவிற்கும் மகளுக்குமான பாசப் போராட்டம். ஒரு கேங்ஸ்டர் கும்பலால் அவர்களின் வாழ்க்கை எப்படி மாறுகிறது என்பதை துரை செந்தில்குமார் மிக அழகாக இயக்கியுள்ளார்.

ரயில் சண்டைக்காட்சியின் போது காயம் ஏற்பட்டாலும், ஆயிரக்கணக்கான தொழிலாளர்களின் உழைப்பு வீணாகக் கூடாது என்பதற்காக முதலுதவி செய்து கொண்டு தொடர்ந்து நடித்தேன். தனுஷ், வெற்றிமாறன் போன்றோர் இப்படத்தைப் பார்த்துப் பாராட்டினார்கள். ‘ஜெயிலர்’, ‘விக்ரம்’ போல இதுவும் ஒரு மெகா ஹிட் படமாக அமையும் என்ற நம்பிக்கை இருக்கிறது.

‘கடவுள் எதையும் நேரடியாகச் செய்வதில்லை, நல்ல மனிதர்கள் மூலமாகத் தான் செய்வார். அவர்களைத் தான் நாம் நம்ப வேண்டும். நீங்கள் என்னை நம்புங்கள்’ – இது படத்தில் எனக்குப் பிடித்த வசனம். கோடை விடுமுறையை லீடர் படத்துடன் கொண்டாடுங்கள்!”

ஏப்ரல் 3-ம் தேதி உலகம் முழுவதும் வெளியாகும் ‘லீடர்’ படத்தில் பாயல் ராஜ்புத், ஷாம், ஆண்ட்ரியா, லால் உள்ளிட்ட பலர் நடித்துள்ளனர். ஆக்ஷன், சென்டிமென்ட் எனப் பொழுதுபோக்கு அம்சங்கள் நிறைந்த ஒரு முழுமையான படமாக இது உருவாகியுள்ளது.