“குடும்பத்துக்கான நேரத்தை மிச்சப்படுத்துங்கள்!”: விஸ்வநாத் & சன்ஸ் விழாவில் சூர்யா!

சிதாரா என்டர்டெயின்மென்ட் மற்றும் ஃபார்ச்சூன் ஃபோர் சினிமாஸ் இணைந்து தயாரிக்க, இயக்குநர் வெங்கி அட்லூரி இயக்கத்தில் நடிகர் சூர்யா நடித்துள்ள ‘விஸ்வநாத் & சன்ஸ்’ திரைப்படத்தின் இசை வெளியீட்டு விழா, கோவையில் உள்ள தனியார் கல்லூரி கலையரங்கத்தில் ஆயிரக்கணக்கான மாணவ-மாணவிகளின் கரகோஷத்திற்கு இடையே திருவிழா போல் கோலாகலமாக நடைபெற்றது!

இப்படத்தில் சூர்யாவுடன் மமீதா பைஜூ, ராதிகா சரத்குமார், ரவீனா தாண்டன், யோகி பாபு, நாசர், காளி வெங்கட், ஜார்ஜ் மரியான், ராஜீவ் மேனன் உள்ளிட்ட பலர் நடித்துள்ளனர். நிமிஷ் ரவி ஒளிப்பதிவு செய்ய, தேசிய விருது பெற்ற ஜி.வி. பிரகாஷ் குமார் இசையமைத்துள்ளார். ஸ்ரீகரா ஸ்டூடியோஸ் வழங்கும் இப்படத்தை சூர்யதேவர நாக வம்ஷீ மற்றும் சாயி சௌஜன்யா இணைந்து தயாரித்துள்ளனர். படம் ஆகஸ்ட் பதினான்காம் தேதி திரைக்கு வருகிறது.

“வாழ்க்கையையே மாத்திய ‘ஆயுத எழுத்து’!” – பாடலாசிரியர் அருண் ராஜா காமராஜ்

நிகழ்ச்சியில் பேசிய பாடலாசிரியர் அருண் ராஜா காமராஜ், “எனக்கு வாழ்க்கையில் பெரிய மேடையைக் கொடுத்ததே ஜி.வி. பிரகாஷ் தான். நான் இயக்குநராகக் காரணம் சூர்யா சாரோட ‘ஆயுத எழுத்து’ படம் தான். இன்னைக்கு அவரோட படத்துக்குப் பாட்டு எழுதி, பாடியிருக்கேன் என்பதை நினைக்கும்போது ரொம்ப சந்தோஷமா இருக்கு. இயக்குநர் வெங்கி அட்லூரி முதல்முறையா எனக்கு ஒரு காதல் பாட்டை எழுதி வைக்கச் சொன்னார். அதுதான் இந்த ‘பட்டாம்பூச்சி’ பாடல். ரசிகர்களின் ஆதரவால் அது பெரிய ஹிட்டாகியிருக்கு” என்றார்.

“சூர்யா சார் ஒரு நிஜ இன்ஸ்பிரேஷன்!” – நடிகை மமீதா பைஜூ

நடிகை மமீதா பைஜூ பேசுகையில், “சூர்யா சாருடன் நடிக்கும் வாய்ப்பு ஏற்கனவே மிஸ் ஆச்சு, ஆனா இந்த முறை அமைஞ்சது மறக்க முடியாத அனுபவம். அவரோட ஒழுக்கம், அணுகுமுறை எல்லாமே எனக்கு பெரிய பாடமா இருந்தது. படப்பிடிப்பில் ராதிகா மேடம் எனக்கு ஒரு நல்ல வழிகாட்டியா இருந்தாங்க. சூர்யா – சுனில் ரெட்டி கெமிஸ்ட்ரி படத்தில் செமையா ஒர்க் அவுட் ஆகியிருக்கு” என்று பகிர்ந்துகொண்டார்.

“தேசிய விருது கொடுத்த லக்கி காம்போ!” – இசையமைப்பாளர் ஜி.வி. பிரகாஷ் குமார்

இசையமைப்பாளர் ஜி.வி. பிரகாஷ் குமார் பேசுகையில், “சூரரைப் போற்று படத்துக்கு அப்புறம் நானும் சூர்யா சாரும் இணைந்து பணியாற்றியிருக்கோம். அது எங்க ரெண்டு பேருக்கும் தேசிய விருதை வாங்கிக் கொடுத்த அதிர்ஷ்டக் கூட்டணி. அதேபோல வெங்கி அட்லூரியுடன் ‘வாத்தி’, ‘லக்கி பாஸ்கர்’ படங்களைத் தொடர்ந்து இது மூணாவது படம். இந்த ‘விஸ்வநாத் & சன்ஸ்’ ஒரு அருமையான ஃபேமிலி என்டர்டெய்னர். சூர்யா ரசிகர்களுக்காகவே ‘தி ஒன்’ (The One) என்ற ஆக்ரோஷமான பாடலை இதில் வெளியிடுகிறோம்” என்றார்.

“தமிழில் ஒரு ‘அலகொண்ட வைகுந்தபுரம்’!” – தயாரிப்பாளர் சூர்யதேவர நாக வம்ஷீ

தயாரிப்பாளர் நாக வம்ஷீ பேசுகையில், “எங்களுக்கு கோவை எப்பவுமே ராசியான இடம். பழனி முருகனை தரிசித்துவிட்டுத்தான் படப்பிடிப்பையே தொடங்கினோம். இந்தப் படத்தில் நீண்ட இடைவெளிக்குப் பிறகு சூர்யா சாரை ‘சஞ்சய் ராமசாமி’ போன்ற ஒரு லுக் மற்றும் கதாபாத்திரத்தில் பார்க்கலாம். தெலுங்கில் வெற்றி பெற்ற ‘அலகொண்ட வைகுந்தபுரம்’ போல, தமிழில் இந்தப் படம் மிகப்பெரிய வெற்றியைப் பெறும் என்று முழுமையாக நம்புகிறோம்” என்றார்.

“குடும்பத்தோடு வந்து பார்க்க வேண்டிய படம்!” – இயக்குநர் வெங்கி அட்லூரி

இயக்குநர் வெங்கி அட்லூரி பேசுகையில், “சூர்யா சாரின் சொந்த மண்ணான கோவையில் இந்த விழாவை நடத்துவதில் பெருமை கொள்கிறோம். கதையைக் கேட்டு 2டி ராஜசேகர் சார் கலங்கிப்போய் சூர்யா சார்கிட்ட கதை சொல்ல வைத்தார். 2023-ல் சூர்யா சாருடன் பணியாற்ற வேண்டும் என வேண்டினேன், அது இப்போது நடந்திருக்கிறது. படத்தில் ராதிகா – சூர்யா – மமீதா மூவருக்கும் இடையே வரும் அந்த பத்து நிமிட காமெடி காட்சி அனைவரின் சொந்த வாழ்க்கை நினைவுகளையும் கிளறும்” என்றார்.

“ஃபோனை ஓரமா வச்சுட்டு, குடும்பத்தோட நேரத்தை செலவிடுங்க!” – நடிகர் சூர்யா உணர்ச்சிப்பூர்வ பேச்சு

இறுதியாகப் பேசிய நடிகர் சூர்யா, “கோவை ஏர்போர்ட்டில் இருந்து விழா மேடை வரை ரசிகர்கள் கொடுத்த வரவேற்பு பிரமிக்க வைக்கிறது. என் பிறந்தநாளை நான் கொண்டாடலைனாலும், ஆயிரக்கணக்கானோர் ரத்த தானம், நலத்திட்ட உதவிகள் செய்ததை கவனித்துக்கொண்டுதான் இருந்தேன்.

கோவைக்கு வந்தாலே எனக்கு பழைய நினைவுகள் வந்துடும். பள்ளி விடுமுறைக்கு வந்தா சூலூர், கவுண்டம்பாளையம்னு சுற்றியதும், கிணற்றில் குதிச்சதும் இன்னும் பசுமையா இருக்கு. போன வருஷம் கூட என் பசங்க தியா, தேவ் கூட வந்து அந்த நினைவுகளைப் பகிர்ந்துக்கிட்டேன். நாம இப்போ டிஜிட்டல் ஸ்கிரீனோட செலவழிக்கிற நேரம் அதிகமாகிடுச்சு. தயவுசெஞ்சு ஃபோனைப் பார்க்குற நேரத்தைக் குறைச்சுட்டு, குடும்ப உறுப்பினர்களோட நேரத்தைச் செலவிடுங்கள், நல்ல நினைவுகளைச் சேமியுங்கள்.

‘கருப்பு’ படத்தின் வெற்றிக்கும், அதற்குத் துணையாக நின்ற விநியோகஸ்தர்கள், திரையரங்கு உரிமையாளர்களுக்கும் நன்றி. அதன் நூறாவது நாள் விழா விரைவில் வரவுள்ளது.

ஜி.வி. பிரகாஷ் மிர்ச்சி ஜிங்கிள்ஸ் பண்ணின காலத்தில் இருந்தே அவரைப் பார்த்து வியந்திருக்கேன். மமீதா பைஜூ இந்த படத்தில் ஒரு மேஜிக் பண்ணியிருக்காங்க, அவங்களே தமிழிலும் டப்பிங் பேசியிருக்காங்க. இயக்குநர் வெங்கி எனக்கு ஒரு புது அடையாளத்தைக் கொடுத்திருக்கார். இந்த படம் ரொமான்ஸ், ஃபேமிலி, காமெடி, ஹீரோயிசம் எல்லாம் கலந்த ஒரு மாஸ் ஃபேமிலி என்டர்டெய்னர். ஆகஸ்ட் பதினான்காம் தேதி திரைக்கு வருகிறது, உங்கள் ஆதரவை வழங்குங்கள்” என்று தன் உரையை நிறைவு செய்தார்.