‘முதற்கனல்’ தகிப்பு! போதை அரக்கனை வீழ்த்த வருகிறார் ‘அப்பா வேணாம்ப்பா’ இயக்குநர்!

மதுவின் கொடுமையை ‘அப்பா வேணாம்ப்பா’ படத்தின் மூலம் ஊருக்கே உரக்கச் சொன்ன இயக்குநர் R.வெங்கட்டரமணன், இப்போது அடுத்த அதிரடிக்குத் தயாராகிவிட்டார்! இந்த முறை மதுவை விட மோசமான, இளைஞர்களின் எதிர்காலத்தையே பொசுக்கிக் கொண்டிருக்கும் ‘சிந்தடிக்’ போதைப்பொருள் சீரழிவை மையமாக வைத்து ‘முதற்கனல்’ திரைப்படத்தை செதுக்கியுள்ளார்.

கதைக்களம்: தடம் மாறும் இளைஞர்கள்.. தவிக்கும் குடும்பங்கள்!

“மதுவுக்குப் பயப்படும் சின்னப் பசங்க கூட, ஈஸியா கிடைக்குதுங்கிறதால இந்த சிந்தடிக் டிரக்ஸ் பக்கம் போயிடுறாங்க” என இயக்குநர் வேதனையுடன் குறிப்பிடுகிறார். போதை மறுவாழ்வு மையங்களில் அவர் நேரில் கண்ட வலிகளும், பள்ளி-கல்லூரி மாணவர்கள் தடம் மாறி நிற்கும் அவலமுமே இந்தப் படத்தின் கரு.

வெறும் அறிவுரை சொல்லும் படமாக மட்டும் இல்லாமல், அனைத்துத் தரப்பினரையும் கவரும் விதமான கமர்சியல் அம்சங்களோடு, ஒரு பக்கா பேமிலி என்டர்டெய்னராக இந்தப் படம் உருவாகியுள்ளது.

நட்சத்திரப் பட்டாளம் & தொழில் நுட்பம்

புதுமுகங்களுக்குப் பெரிய அளவில் வாய்ப்பளித்துள்ள இப்படத்தில் அஸ்வின், விக்னேஷ், ராஜேஷ் என ஒரு நீளமான நட்சத்திரப் பட்டியலே இருக்கிறது. இதில் ஒரு ஸ்பெஷல் என்னவென்றால், இயக்குநர் வெங்கட்டரமணனும் ஒரு வழக்கறிஞர் கதாபாத்திரத்தில் திரையில் தோன்றுகிறார்!