ஓ பட்டர்ஃபிளை: விமர்சனம்: காதல் வலையில் சிக்கிய சைக்கோ த்ரில்லர்!

ஒன்லைன் ஸ்டோரி:

நிம்மதி தேடி கணவனுடன் மலைப் பிரதேசத்திற்கு வரும் நாயகி, அங்கே எதிர்பாராத விதமாகத் தனது முன்னாள் காதலனைச் சந்திக்கிறாள். வழக்கமான படங்களில் யாராவது ஒருவர் ‘விட்டுக்கொடுத்து’ தியாகியாக மாறுவார்கள். ஆனால் இங்கே? இரண்டு ஆண்களுமே சுயநலத்தின் உச்சத்திற்குச் சென்றால், இடையில் சிக்கிக்கொண்ட அந்தப் பெண்ணின் நிலை என்ன? இதுதான் படத்தின் விறுவிறுப்பான கரு!

ப்ளஸ்:

• நிவேதிதா சதீஷின் விஸ்வரூபம்: கதை இவரைச் சுற்றித்தான் சுழல்கிறது. ‘Harm OCD’ எனும் மருத்துவச் சிக்கலை உள்வாங்கி, கணவனுக்கும் காதலனுக்கும் இடையில் சிக்கித் தவிக்கும் தவிப்பை நிவேதிதா அபாரமாகப் பிரதிபலித்திருக்கிறார்.

• அத்துலின் தவிப்பு: வேலையில்லாத விரக்தி, மனைவியின் நெருக்கம் கிடைக்காத ஏக்கம், இறுதியில் நண்பன் செய்த துரோகம் என எல்லா உணர்ச்சிகளையும் அத்துல் கணகச்சிதமாக வெளிப்படுத்தியுள்ளார்.

• வில்லன் சிபி சந்திரன்: ஹீரோ மெட்டீரியலாகத் தோற்றமளித்தாலும், வில்லத்தனத்தில் ஒரு அளவுகோலை வைத்து மிரட்டியிருக்கிறார்.

• நாசரின் ‘மரண வாசனை’: வீட்டுப் பணியாளராக வரும் நாசர், உயிர்கள் மீது காட்டும் அக்கறையும், அவர் உணரும் அந்த மரண வாசனையும் தியேட்டரில் புல்லரிக்க வைக்கிறது.

• தைரியமான கிளைமாக்ஸ்: கிளைமாக்ஸில் என்ன நடக்கும் என்பதை ஆரம்பத்திலேயே சொல்லிவிட்டு, ‘நான்-லீனியர்’ (Non-linear) பாணியில் கதையை நகர்த்திய இயக்குநரின் தைரியத்தைப் பாராட்டலாம்.

• தொழில்நுட்பம்:

• ஒளிப்பதிவு: வேதராமன் சங்கரனின் கேமரா, அந்த மலை வாசஸ்தலத்தின் அழகையும், த்ரில்லர் மூடுக்கான அடர்த்தியையும் ஒருசேரப் படம் பிடித்திருக்கிறது.

• இசை: வைசாக் சோமநாதனின் இசை, திரைக்கதையின் விறுவிறுப்புக்குத் தூணாக நின்று நம்மை இருக்கை நுனியில் உட்கார வைக்கிறது.

மைனஸ்:

கைரேகை பாட்டியாக வரும் கீதா கைலாசத்தின் பாத்திர முடிவும், வில்லன் சிபி சந்திரனின் கிளைமாக்ஸ் முடிவும் கொஞ்சம் ‘சினிமாத்தனமாக’ இருப்பது படத்தின் எதார்த்தத்தைக் கொஞ்சம் குறைக்கிறது.

ஃபைனல் கமெண்ட்:

ஒரு சைக்கலாஜிக்கல் த்ரில்லரை எப்படி நேர்த்தியாகக் கையாள வேண்டுமோ, அப்படிச் கையாண்டிருக்கிறார் விஜய் ரங்கநாதன். வெகுஜன மக்கள் மத்தியில் இந்தப் புதிய முயற்சி எப்படிப்பட்ட வரவேற்பைப் பெறும் என்பது ஒரு ‘சஸ்பென்ஸ்’தான் என்றாலும், ‘ஓ பட்டர்ஃபிளை’ – தமிழ் சினிமாவின் ஒரு அழகான மற்றும் விசித்திரமான முயற்சி!