‘சீதா பயணம்’: விமர்சனம்: நெகிழ்ச்சியான பயணம்!

அர்ஜுனின் கைவண்ணத்தில், மகள் ஐஸ்வர்யா அர்ஜுனை முன்னிறுத்தி உருவாகியிருக்கும் ‘சீதா பயணம்’, ஒரு விபத்தில் நூலிழையில் உயிர் தப்பிய பெண், அந்தத் தாமதத்திற்குக் காரணமானவர்களுக்கு நன்றி சொல்லத் தொடங்கும் ஒரு .

கதை:  “வாழ்க்கையில் சில நொடிகள் தாமதம் நம் எரிச்சலைக் கிளப்பும்; ஆனால் அதே சில நொடிகள் தான் ஒரு மரண விபத்திலிருந்து நம்மைக் காப்பாற்றியது என்றால்?” – இந்த ஒரு வரி (One-liner) அட்டகாசமான கற்பனை. சமையல் கலை ஒர்க்‌ஷாப்பிற்குச் செல்லும் சீதா, வழியில் பலரைச் சந்திப்பதால் ஏற்படும் சில நிமிடத் தாமதத்தால் ஒரு பெரும் வெடிப்புச் சம்பவத்திலிருந்து உயிர் தப்பிக்கிறாள். தனக்கு வாழ்வு கொடுத்த அந்தத் தாமதத்திற்குக் காரணமான மனிதர்களைத் தேடி அவள் மீண்டும் பயணிப்பதுதான் படத்தின் ஆன்மா.

நடிப்பு: சீதாவாக ஐஸ்வர்யா அர்ஜுன் மிக முதிர்ச்சியான நடிப்பை வழங்கியிருக்கிறார். நடனம், எமோஷன் என இரண்டிலும் ஸ்கோர் செய்கிறார். அப்பாவாக வரும் சத்யராஜ் மற்றும் தாத்தாவாக வரும் பிரகாஷ்ராஜ் ஆகியோர் அனுபவ நடிப்பால் படத்திற்குத் தூணாக நிற்கிறார்கள். கோவை சரளா, சுமித்ரா எனப் பட்டாளமே இருந்தாலும், நாயகனாக வரும் நிரஞ்சனின் நடிப்பு ஏனோ அந்நியமாகவே தெரிகிறது. தெலுங்குப் படத்தின் நேரடித் தாக்கம் அவர் பாத்திரத்தில் துருத்திக் கொண்டு தெரிகிறது. துருவா சர்ஜாவின் கேமியோ ஆக்ஷன் ரசிகர்களுக்கான தீனி!தொழில்நுட்பம்: ஜி. பாலமுருகனின் ஒளிப்பதிவு படம் முழுக்க ஒரு வண்ணமயமான திருவிழா உணர்வைக் கொடுக்கிறது. அனூப் ரூபன்ஸின் பின்னணி இசை உணர்ச்சிகரமான காட்சிகளுக்கு பலம் சேர்த்தாலும், பாடல்களில் தெலுங்கு வாடை வீசுவதைத் தவிர்க்க முடியவில்லை. சண்டைக்காட்சிகளைக் குறைத்துவிட்டு உறவுகளுக்கு முக்கியத்துவம் கொடுத்த அர்ஜுனின் இயக்கம் பாராட்டத்தக்கது.

பிளஸ் & மைனஸ்: படத்தின் முதல் பாதி ஒரு அழகான டிராவல் மூவி போல நகர்கிறது. ஆனால், இரண்டாம் பாதியில் கிராமத்துக் கலாச்சாரம், கூட்டுக்குடும்பம் என்ற பெயரில் வரும் காட்சிகள் 90-களின் சினிமாத்தனத்தை நினைவுபடுத்துகின்றன. குறிப்பாக, சீதாவைத் தாமதப்படுத்திய சம்பவங்கள் அனைத்தும் ஒரு திட்டமிடப்பட்ட நாடகம் என்று தெரியவரும் ட்விஸ்ட், படத்தின் அந்த அழகான ‘நன்றி சொல்லும்’ நோக்கத்தையே சிதைத்து விடுகிறது. பல இடங்களில் லிப்-சிங்க் சரியாக இல்லாதது இது ஒரு டப்பிங் படமோ என்ற உணர்வை அடிக்கடி ஏற்படுத்துகிறது.

மொத்தத்தில்… ‘சீதா பயணம்’ ஒரு நேர்த்தியான தொடக்கத்தைக் கொண்டிருந்தாலும், திரைக்கதையில் ஏகப்பட்ட ‘எக்ஸ்ட்ரா வெயிட்’ ஏற்றியதால் பயணத்தின் வேகம் குறைகிறது. தேவையற்ற செண்டிமெண்ட் காட்சிகளையும், செயற்கையான திருப்பங்களையும் தவிர்த்திருந்தால் இந்தப் பயணம் இன்னும் இனிமையாக இருந்திருக்கும். லாஜிக் மீறல்களைத் தாண்டி, குடும்பத்தோடு பார்க்கக்கூடிய ஒரு கமர்ஷியல் எமோஷனல் டிராமா இது.